Բաղրամյան պողոտայում նստացույցի մասնակիցները պահանջում են, որպեսզի միացնեն Գրողների միության շենքից ստացվող հոսանքը, որից էլ միացնում են իրենց բարձրախոսնեը: Ակտիվիստների խոսքով, հոսանքը ոստիկանությունն է անջատում: 

Նստացույցի համակարգողներից, ակտիվիստ Դավիթ Սանասարյանը NEWS.am-ի թղթակցին տեղեկացրեց, որ իրենք պատրաստվում են շատ կարեւոր հայտարարությամբ հանդես գալ: «Ոստիկանությունն այդ քայլով սադրում է ժողովրդին եւ ստիպում, որ ավելի կտրուկ քայլերի գնանք»,- հայտարարեց Սանասարյանը՝ հավելելով, որ այդ քայլերի մասին քաղաքացիների հետ կխորհրդակցեն ու կորոշեն անելիքը:

Հայտարարության մանրամասները ներկայացնել նա չցանկացավ՝ նշելով միայն, որ այն վերաբերում է իրենց ռազմավարությանն ու հետագա քայլերին:

NEWS.am-ի թղթակիցը նշում է, որ նախորդող օրերին նույնպես հոսանքի անջատման դեպքեր եղել են:

Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում՝ ընդդեմ էլեկտրաէներգիայի սակագնի բարձրացման։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, սակայն մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։