Բաղրամյան պողոտայում այսօր՝ հուլիսի 2-ին, ցուցարարները բեմադրում են հունիսի 23-ի առավոտյան ոստիկանների գործողությունները՝ ջրցան մեքենաներով ցույցը ցրելը:
Ցուցարարներից մեկը որը Երեւանի փոխոստիկանապետ Վալերի Օսիպյանի դերն է ստանձնել, հավաքված երիտասարդների խմբին բարձրախոսով հորդորեց հեռանալ, սակայն ցուցարարները չհեռացան, ինչից հետո Օսիպյանը «կիրառեց իր ձեռքի ջրցանը»:
Ցուցարարները բացականչում էին «Մեր ջրցանին չի, չենք հեռանալու», «Ամոթ»: Ցուցարարներից մեկը կրկնեց ջրցան մեքենաներին միջնամատով արձագանքած երիտասարդի՝ Կարո Ղուկասյանի ժեստը:
Բարեբախտաբար այս անգամ «ոստիկանները» ոչ թե փորձում էին ցրել ցուցարարներին, այլ պարզապես ջրոցի էին խաղում:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: