Չեմ կասկածում, որ Բաղրամյան պողոտայում բողոքի շարժումը կշարունակվի որպես քաղաքական իրողություն: Այս մասին հուլիսի 3-ին կայացած մամուլի ասուլիսի ժամանակ հայտարարեց Ռուս-հայկական (Սլավոնական) համալսարանի Համաշխարհային քաղաքականության եւ միջազգային հարաբերությունների ամբիոնի վարիչ Արման Նավասարդյանը՝ անդրադառնալով Բաղրամյան պողոտայի ցույցերին:
Նրա համոզմամբ՝ այն, ինչ տեղի է ունեցել, չպիտի պատահեր հիմա: «Հայաստանի արտաքին քաղաքականությունը եւ դիվանագիտությունը վերջին ժամանակներս իմ կարծիքով բավական հաջող քայլեր են գրանցում, ես նկատի ունեմ դիվերսիֆիկացված քաղաքականությունը: Մենք կարող էինք ոչ միայն կամուրջ դառնալ երկու բեւեռների միջեւ, այլ նաեւ օգտակար լինել դրանց մերձեցման համար: Կարծես թե Եվրոպան ցանկանում է մեզ օգտագործել որպես «Տրոյական ձի», եւ ես գիտեմ, որ ռուս քաղաքական իսթեբլիշմենթում նույնպես շատ լուրջ ուժեր կան, որոնք Հայաստանը դիտարկում են այդ տեսանկյունից:
Եվ հանկարծ այդ իրավիճակում Հայաստանն իրեն ի ցույց է դնում որպես ոստիկանական պետություն: Մեր միջազգային հեղինակությանը հասցված ավելի լուրջ հարված դժվար է պատկերացնել: Ես չեմ ընդունում, երբ ասում են, որ դա ապաքաղաքական երեւույթ է. մի՞թե դա քաղաքական երեւույթ չէ: Եթե հաշվի առնենք զանգվածների հոգեբանությունը, ապա Հայաստանում այդ շարժումը կարող է մարել, բայց մեղմանալ չի կարող», -ասաց Նավասարդյանը: