Հայաստանում էլեկտրաէներգիայի թանկացման դեմ շարժումը բերեց նրան, որ կայացվեց իրավիճակային որոշում, եւ վերականգնվեց հավատը սեփական ուժերի նկատմամբ: Այս մասին հուլիսի 3-ին կայացած մամուլի ասուլիսի ժամանակ հայտարարեց քաղտեխնոլոգ Վիգեն Հակոբյանը:
Նրա կարծիքով՝ ամենամեծ խնդիրն այն է, որ հայ հասարակությունը վախենում է «քաղաքական» բառից, քանի որ այդ վախը պայմանավորված է հիասթափություններով: «Հայաստանում ցանկացած տարերային շարժում աշխարհագրական դիրքի պատճառով անմիջապես հայտնվում է տարբեր վեկտորների հետաքրքրությունների կենտրոնում: Հայաստանում այս պահին դրված չէ ռուսական ազդեցությունից դուրս գալու խնդիր: Արեւմուտքն էլ շատ լավ հասկանում է դա, բայց ամեն օր աշխատում է: Դա այսպես կոչված փափուկ ուժն է: Հայաստանում լուրջ քաղաքական գործընթացը հնարավոր կլինի միայն այն դեպքում, երբ կվերականգնվի ընդդիմադիր քաղաքական դաշտը»,- նկատեց քաղտեխնոլոգը:
