Բաղրամյան պողոտայում նստացույցի նախաձեռնության համակարգողներից Դավիթ Սանասարյանն այս պահին, ինչպես նախապես նշվել էր, հայտարարություն է ընթերցում:
«Երկու շաբաթ է՝ դուրս ենք գալիս փողոց՝ ապացուցելով, որ վճռական ենք ու կանգնելու ենք մինչեւ հաղթանակ:
Այս օրերին իշխանություններն ուժ կիրառեցին, սադրանքներ հրահրելով՝ փորձեցին արժեզրկել շարժումը, ցույց տալ, որ այս ամենն ինքնանպատակ է դարձել: Չնայած դրան, Հայաստանի քաղաքացին կանգնած է բարիկադների մատույցներում»,- մասնավորապես նշված է Դավիթ Սանասարյանի ընթերցած հայտարարությունում: Այլ մանրամասներ կներկայացնենք քիչ ուշ:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
