«Բաղրամյան պողոտան, որտեղ 14 օր է՝ էլեկտրաէներգիայի սակագնի բարձրացման դեմ քաղաքացիները նստացույց էին անցկացնում, այս պահին բաց է: NEWS.am-ի թղթակիցը հաղորդում է, որ հարյուրավոր ոստիկաններ այս պահին պատ կազմած կանգնել են Բաղրամյան պողոտայի մայթերին, պողոտայում վերականգնվել է երթեւեկությունը (ֆոտոռեպորտաժ):
Երեւանի փոխոստիկանապետ Վալերի Օսիպյանը լրագրողների հետ զրույցում նշեց, որ բերման ենթարկած ցուցարարների թիվն այս պահին պարզ չէ: Նա նշեց, որ բերման ենթարկվածներն ազատ կազատվեն 3 ժամից «կամ ավելի շուտ»:
Հիշեցնենք, որ ոստիկանությունն այսօր՝ հուլիսի 6-ին, հայտարարություն էր տարածել, որ պատրաստվում է այսօր բացել Բաղրամյան պողոտան: Հայտարարությունում ցուցարարներին ժամանակ է տրված մինչեւ 12.30-ը ինքնուրույն բացել պողոտան:
