Հայաստանում վերջին օրերի կատարվածը խոսում է այն մասին, որ մեր երիտասարդությունն ազգային զարթոնք ապրեց: Այս մասին այսօր` հուլիսի 6-ին, լրագրողներին ասաց գեղանկարիչ Նիկոլ Աղաբաբյանը` անդրադառնալով էլեկտրաէներգիայի սակագնի բարձրացման դեմ պայքարող երիտասարդների պայքարին:
«Ի՞նչ է նշանակում հոսանքի թանկացման հարցում աուդիտ անել: Եթե մեր ղեկավարն ամեն ինչից տեղյակ չէ ու աուդիտ է հայտարարում, ուրեմն դա լավ բան չէ: Ես դրան չեմ հավատում, նա լավ էլ տեղյակ է ամեն ինչից: Մենք այսօր երկիրը կորցնելու վտանգի առջեւ ենք կանգնած, տնտեսությունը զրոյական է դարձել, արտաքին քաղաքականություն գոյություն չունի, ղեկավարություն գոյություն չունի, միակ լավ բանը երիտասարդների պայքարն է»,-ասաց Նիկոլ Աղաբաբյանը:
Անդրադառնալով հունիսի 23-ին ոստիկանների գործողություններին՝ գեղանկարիչն ասաց, որ նրանք պետք է վերանայեն իրենց գործողությունները եւ բոլոր հրամանները չէ, որ պետք է կատարեն:
«Հայկազունք» համույթի գեղարվեստական ղեկավար Գուսան Հայկազունը
էլ նշեց, որ Բաղրամյան պողոտայում տեղի ունեցող իրադարձությունները նմանեցնում է 1988-ին տեղի ունեցող իրադարձություններին եւ դա իրեն շատ է ուրախացնում:
«Երիտասարդներն ըմբոստ առյուծներ են ինձ հիշեցնում: Ընդդիմություն գոյություն չունի, ավագ սերունդը ձեռքերը լվացել է եւ ամեն ինչ մնացել է էս էրեխեքի ձեռքին, ես նրանց ցավը տանեմ»,- ասաց Գուսան Հայկազունը:
Երգահան, երգիչ Եղիշե Պետրոսյանն էլ ասաց, թե ոստիկանապետի այն արտահայտությունը, որ «սա փոքր երկիր է, սթափվեք», շատ կարեւոր կոչեր են, սակայն դա պետք է ուղղված լինի իշխանություններին, քանի որ, բոլորն էլ շատ լավ գիտեն, թե ով, ինչ եւ ում է թալանում:
«Սթափվելու կոչերը պետք է բարիկադներից այս կողմից հնչի՝ պարոնա՛յք, սթափվե՛ք, ժողովուրդն էլ ուժ չունի»,- ասաց Եղիշե Պետրոսյանը: