Ոստիկանությունը Ազատության հրապարակում հավաքված մի քանի հարյուր քաղաքացիներին թույլ չի տա երթ անցկացնել: Այս մասին այսօր՝ հուլիսի 6-ին, Ազատության հրապարակում հանրահավաքի ժամանակ լրագրողների հետ զրույցում ասաց Երեւանի փոխոստիկանապետ Վալերի Օսիպյանը:
«Մենք հորդորում ենք քաղաքացիներին մնալ Ազատության հրապարակում եւ զերծ մնալ անօրինական երթերից: Ոստիկանությունն այստեղ է, որպեսզի կանխի բոլոր անօրինական գործողությունները»,- ասաց Օսիպյանը՝ կոչ անելով հավաքվածներին զերծ մնալ սադրանքներից, որոնք ձեռնտու են «մի քանի հոգու»:
Փոխոստիկանապետը նշեց, որ ոստիկանությունը դեմ չէ ցուցարարների հավաքներին եւ երթերին, սակայն դրանք, նրա խոսքով, պետք է արտոնված լինեն լիազոր մարմինների կողմից:
Վալերի Օսիպյանը ավելացրեց, որ ցուցարարները պետք է թույլտվություն ստանան ոչ միայն քաղաքապետարանից, այեւ Մշակույթի նախարարությունից, քանի որ Ազատության հրապարակը պատմամշակութային տարածք է:
«Այստեղ մեր երկու արձաններն են՝ Սպենդարյանինը եւ Թումանյանինը, եւ առհասարակ այս տարածքը համարվում է պատմամշակութային տարածք: Այդ պատճառով կհորդորենք հավաքվածներին դիմել նաեւ Մշակույթի նախարարություն, ստանալ համապատասխան թույլտվություն»,- ասաց փոխոստիկանապետը:
NEWS.am-ի թղթակիցը փոխանցում է, որ այս պահին Ազատության հրապարակում են հավաքվել մի քանի հարյուր քաղաքացիներ, որոնք քննարկում են իրենց հետագա անելիքները:
Հիշեցնենք, որ ոստիկանությունն այսօր՝ հուլիսի 6-ին, հայտարարություն էր տարածել, որ պատրաստվում է այսօր բացել Բաղրամյան պողոտան: Ցուցարարներին ժամանակ էր տրվել մինչեւ 12:30-ը ինքնուրույն բացել պողոտան: Չնայած ոստիկանության հորդորներին՝ ցուցարարները նստել էին փողոցում եւ շարունակում էին նստացույցը: Ոստիկանական ուժերի թիվը Բաղրամյան պողոտայում 13:00-ի սահմանում կտրուկ ավելացավ, նրանք պողոտայում նստած ցուցարարների մեծ մասին ոտքերից բռնած, գրկած վիճակում բերման ենթարկեցին, մյուս մասին շղթա կազմած հեռացրին դեպի մայթ: Գործողության ընթացքում բերման ենթարկվեց 46 քաղաքացի: Այս պահին Բաղրամյան պողոտան բաց է, երթեւեկությունը վերականգնվել է:
Լուսանկարները՝ Արսեն Սարգսյանի /NEWS.am