Հայաստանում շատ խնդիրներ կան, որոնք ժողովուրդն արդեն չի կարողանում հաղթահարել: NEWS.am-ի հետ զրույցում այս մասին ասաց Աստղիկ Աղեկյանը, որն այսօր` հուլիսի 27–ին, Հանրապետության հրապարակում մասնակցում էր ընդդեմ էլեկտրաէներգիայի թանկացման «Ոտքի, Հայաստան» նախաձեռնության կազմակերպած նստացույցին (ֆոտոռեպորտաժ)։
Նրա խոսքով` անհրաժեշտ է, որ բոլորը միանան պայքարին, քանի որ նման պայմաններում Հայաստանը գնալով դատարկվում է։
«Մեր երկրում այնքան շատ են խնդիրները, որ այլևս չենք կարողանում հանդուրժել: Ժողովուրդը հեռանում է Հայաստանից, որովհետև այստեղ չի կարողանում գումար վաստակել: Հենց դա էլ բերում է ընտանիքների կործանմանը, որովհետև տղամարդիկ դրսերում են, բոլորն իրար սիրած են դառնում։ Տղամարդկանց էլ չի կարելի մեղադրել, խեղճերը պետք է փող աշխատեն, վարձ մուծեն, երեխաներին ուսումի տան, ընտանիք պահեն »,-ասաց նա` նշելով, որ էլեկտրաէներգիայի թանկացումն ավելի կդժվարացնի ապրուստը եւ նոր խթան կդառնա արտագաղթի համար։
Հիշեցնենք, որ «Ոտքի, Հայաստան» շարժումը հայտարարել է, որ այսօրվանից 72–ժամյա նստացույց է սկսում Հանրապետության հրապարակում։ Միաժամանակ, Վանաձորից մեկնարկել է շարժման անդամների մարզային երթը, որի մասնակիցները իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։ Էլեկտրաէներգիայի թանկացման դեմ բողոքի առաջին ալիքը նախաձեռնած եւ օրեր շարունակ նույն պահանջով Բաղրամյան պողոտան փակած «Ոչ թալանին» նախաձեռնությունը մերժել է նստացույցին միանալու առաջարկը։
Հիշեցնենք, որ «Ոտքի Հայաստան» նախաձեռնությունը հայտարարել էր, որ եթե ՀԾԿՀ-ն չչեղարկի էլեկտրաէներգիայի սակագնի բարձրացման մասին որոշումը, հուլիսի 27-ից սկսելու են մի շարք բողոքի ակցիաներ: Նախաձեռնության անդամներն այցելելու են մարզեր, ինչպես նաև փողոցներ են փակելու։