«Ոտքի Հայաստան» նախաձեռնությունն իր անհնազանդության ակցիաները շարունակելու է այնքան ժամանակ, մինչեւ որ ոստիկանությունը ստիպված լինել անհամաչափ ուժեր կուտակել Հանրապետության հրապարակում՝ շրջապատելով այն: Այս մասին այսօր՝ հուլիսի 28-ին, Հանրապետության հրապարակում NEWS.am-ի հետ զրույցում ասաց «Ոտքի Հայաստան» նախաձեռնության խորհրդի անդամ Անդրիաս Ղուկասյանը:
«Այսօր մեր ակցիաներին մասնակցում էր մոտավորապես 60 մարդ: Նպատակ ունենք այնպիսի իրավիճակ ստեղծել, որ ոստիկանությունը ստիպված անհամաչափ ուժեր կիրառի Հանրապետության հրապարակում: Մեր այս քայլով փորձելու ենք ոստիկանությանը եւ իշխանությանը բերել այն կարծիքին, որ ավելի ճիշտ է ենթարկվել մեր պահանջին, քան այսքան ռեսուրս ծախսել մեր օրինական պահանջը խոչընդոտելու համար: Այս առումով մեր գործողությունները հետեւողականորեն շարունակվելու են, մինչեւ որ ոստիկանությունը ստիպված լինի բացել Հանրապետության հրապարակի կենտրոնը»,-ասաց նա:
Նշենք, որ այս պահին Հանրապետության հրապարակում իրավիճակը խաղաղ է: Մեծ թվով ոստիկաններ շարունակում են հսկել ակտիվիստներին: Ակտիվիստների թիվը մի քանի տասնյակ է: Նրանք վանկարկում են` «Ոչ էլեկտրաէներգիայի թանկացմանը»:
«Ոտքի Հայաստան» շարժումը հայտարարել է, որ հուլիսի 27-ից 72-ժամյա նստացույց է սկսում։ Սակայն ոստիկանությունը նրանց թույլ չի տալիս մոտենալ հրապարակի կենտրոնի գորգին։ Ակտիվիստները գիշերել են Հանրապետության հրապարակում։ Գիշերը խաղաղ է անցել, առավոտից վերսկսվել են ակտիվիստների անհնազանդության ակցիաները։
Միաժամանակ, Վանաձորից մեկնարկել է շարժման անդամների մարզային երթը, որի մասնակիցներն իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։
Հիշեցնենք, որ «Ոտքի Հայաստան» նախաձեռնությունը հայտարարել էր, որ եթե ՀԾԿՀ-ն չեղյալ չհայտարարի էլեկտրաէներգիայի սակագնի բարձրացման մասին որոշումը, հուլիսի 27-ից բողոքի ակցիաներ են սկսելու: Նախաձեռնության անդամներն այցելելու են մարզեր, ինչպես նաեւ փողոցներ են փակելու։