Ռուսաստանցի հայտնի ռեժիսոր Էլդար Ռյազանովը հուլիսի վերջին սկսել է հեւոցներ եւ սրտի շրջանում ցավեր ունենալ: Նրա ընտանիքը որոշել է ռեժիսորին ուղարկել Մոսկվայի սրտաբանական կենտրոն՝ պլանային հետազոտություն անցնելու: Ստուգման արդյունքում բժիշկները որոշել են սրտի վիրահատություն անցկացնել: Այս մասին ՏԱՍՍ-ին հայտնել է բժշկական շրջանակների աղբյուրը:
«Էլդար Ռյազանովին մեզ մոտ են բերել նրա ընտանիքի անդամները: Բժիշկները սրտի մեկօրյա մոնիտորինգ եւ կորոնոգրաֆիա են իրականացրել: Արդյունքում պարզվել է, որ սիրտը սնուցող անոթները նեղացել են, հետեւաբար անոթների ստենտավորում է իրականացվել»,-հայտնել է գործակալության զրույցակիցը:
Նրա խոսքով, 87-ամյա ռեժիսորն այժմ գտնվում է վերակենդանացման բաժանմունքում: Նրա վիճակը լավ է եւ մոտ ժամանակներս կտեղափոխվի սովորական հիվանդասենյակ:
