Կառավարման համակարգի արդյունավետությունը կախված է նաեւ դրա կիրառումից: Այս մասին NEWS.am-ի թղթակցի հետ զրույցում հայտարարեց Հայաստանի Ազգային ժողովի արտաքին հարաբերությունների հանձնաժողովի ղեկավար, ՀՀԿ պատգամավոր Արտակ Զաքարյանը՝ անդրադառնալով հարցին, թե Հայաստանում որքանո՞վ արդյունավետ կգործի կառավարման խորհրդարանական ձեւը:
«Եթե մեզ հաջողվի պրոֆեսիոնալ խորհրդարան ձեւավորել՝ կայացած քաղաքական ուժերով եւ լուրջ կենսագրությամբ քաղաքական գործիչներով, բնականաբար, կառավարման խորհրդարանական ձեւը կարող է իսկապես արդյունավետ մոդել դառնալ մեր երկրի համար»,- ասաց Արտակ Զաքարյանը:
Նկատառմանը, որ շատերն ընդգծում են Հայաստանի համար կառավարման կիսանախագահական ձեւի նպատակահարմարությունը, երկիր, որը պատերազմական վիճակում է, պատգամավորը նշեց, որ խնդիրը որոշումների կայացման գործընթացում է: «Եթե մեզ հաջողվի որոշումների ընդունման կայուն համակարգ եւ վստահ գործող մեծամասնություն ձեւավորել՝ լինի կոալիցիոն, թե մեկ ուժի կողմից ձեւավորված, այդ դեպքում, կարծում եմ, անվտանգության հարցերը լիարժեք լուծում կստանան»,- ընդգծեց Արտակ Զաքարյանը:
Նախագահական նստավայրում օգոստոսի 26-ին սկսվել են Սերժ Սարգսյանի հանդիպումները քաղաքական ուժերի ներկայացուցիչների հետ՝ սահմանադրական բարեփոխումները քննարկելու նպատակով:
Հիշեցնենք, որ Հայաստանի նախագահին առընթեր սահմանադրական բարեփոխումների մասնագիտական հանձնաժողովը հաստատել է բարեփոխումների նախագիծն ու ներկայացրել հանրապետության ղեկավարին: Օգոստոսի 21-ին Սերժ Սարգսյանը նախագիծն ուղարկել է Ազգային ժողով: Ակնկալվում է, որ սահմանադրական բարեփոխումների նախագիծը խորհրդարանի աշնանային նստաշրջանի առաջին իսկ քառօրյայում քննարկման կդրվի: Խորհրդարանի խոսնակի փոխանցմամբ, նախատեսվում է աշնան վերջին հանրաքվե անցկացնել: