«Օրինաց երկիր» կուսակցությունը անընդունելի է համարում Սահմանադրական բարեփոխումների նախագիծի այս տարբերակը եւ կողմ է մի շարք դրույթների փոփոխմանը, որոնց վերաբերյալ այսօր՝ օգոստոսի 26-ին, Սահմանադրական բարեփոխումների շուրջ խորհրդակցությունների շրջանակում նախագահ Սերժ Սարգսյանի հետ հանդիպմանը հանդես է եկել մի շարք առաջարկներով: Այս մասին NEWS.am-ի հետ զրույցում ասաց ՕԵԿ ներկայացուցիչ Մհեր Շահգելդյանը՝ ավելացնելով, որ հանդիպումը անցել է փոխըմբռնման մթնոլորտում:
«Քննարկումը փոխըմբռնման մթնոլորտում անցավ: Քննարկվեցին Սահմանադրության բազմաթիվ դրույթներ: Մենք ունեինք առաջարկներ, որոնք նախագահը լսեց: Նրա ներկայացուցիչները արդեն Ազգային ժողովում մեր ֆրակցիա գալուց կներկայացնեն դրանք: Մենք առաջարկել ենք 5 կոնցեպտուալ կետեր, ինչպես նաեւ հանդես ենք եկել բազմաթիվ հոդվածներ փոփոխելու վերաբերյալ առաջարկներ»,- ասաց ՕԵԿ ներկայացուցիչը՝ ավելացնելով, որ Սահմանադրական բարեփոխումների նախագծի վերջնական տարբերակը կքննարկվի «Հայկական վերածնունդ» հասարակական-քաղաքական միավորման խորհուրդի նիստին:
Մհեր Շահգելդյանը դրական գնահատեց այն, որ Սահմանադրական բարեփոխումների նախագծից դուրս է եկել «ընտրիչների» համակարգը, եւ երկփուլ ընտրությունները, ըստ էության, փոփոխության կենթարկվեն:
Հիշեցնենք, որ Հանրապետության նախագահ Սերժ Սարգսյանն այսօր՝ օգոստոսի 26-ին, սկսել է քաղաքական խորհրդակցությունները քաղաքական ուժերի հետ՝ կապված Սահմանադրական բարեփոխումների հետ: Նախագահն արդեն հանդիպել է ԲՀԿ եւ ՀՅԴ ներկայացուցիչների հետ: Այս պահին ընթանում է հանդիպում ՕԵԿ-ի հետ:
Ավելի վաղ հայտնել էինք, որ Սահմանադրության նոր նախագիծն արդեն ուղարկվել է Ազգային ժողով: Սպասվում է, որ աշնանային նստաշրջանի առաջին քառօրյայում կսկսվեն քննարկումները: ԱԺ նախագահի խոսքով՝ աշնան վերջին արդեն նախատեսվում է հանրաքվեն:
