Կասկածներն առ այն, թե Հայաստանում սահմանադրական բարեփոխումներն ուղղված են իշխանության վերարտադրությանը, հիմնավոր են։ Այս մասին օգոստոսի 27-ին կայացած մամուլի ասուլիսի ժամանակ հայտարարեց Հայաստանի առաջին օմբուդսմեն, «Ընդդեմ իրավական կամայականության» ՀԿ ղեկավար Լարիսա Ալավերդյանը։
Նրա խոսքով՝ կարելի է հստակ ասել, որ այդ միտումը միշտ եղել է, բայց ՀՀԿ-ն աստիճանաբար ավելի քիչ ձայներ էր հավաքում։ «Այստեղ ինձ մոտ հարց է ծագում. Սերժ Սարգսյա՞նն է հարկադրում է վերարտադրել իշխանությունը, թե՞ նրա կողքին կանգնած օլիգարխիկ համակարգը»,- ընդգծեց Լարիսա Ալավերդյանը։
Այդ ենթատեքստում անդրադառնալով Սյունիքի մարզպետ Սուրիկ Խաչատրյանի եւ Հայաստանի Ֆուտբոլի ֆեդերացիայի նախագահ Ռուբեն Հայրապետյանի մասնակցությամբ միջադեպերին՝ Հայաստանի առաջին օմբուդսմենը հայտարարեց. «Անկախ նրանից, մեղավոր են նրանք, թե ոչ, նման մեծ կասկածների դեպքում նրանք պետք է հրաժարական տան։ Սա նրանց համար պատիվը պահպանելու վերջին հնարավորությունն է։ Ինձ համար աբսուրդ է այն, որ բողոքի բացակայության դեպքում քրեական գործ չեն հարուցում այն պարագայում, եթե քրեական հանցագործություն է տեղի ունեցել»։ Լարիսա Ալավերդյանը նաեւ հավելեց, որ ՀՀԿ անդամները վստահ են, որ «իրենցից լավ ոչ ոք չկա»։