Ռուսաստանցի գործարար Գերման Ստերլիգովի կինը պատմել է, թե մոսկովյան Դոմոդեդովոյում ինչպես են ձերբակալել ամուսնուն: Կնոջ խոսքով, իրենց Երեւանից Մոսկվա են մեկնել երկուշաբթի, ժամը 16:40-ին՝ իրենց գյուղատնտեսական բիզնեսի հետ կապված մի քանի հարցեր լուծելու համար: Ալյոնայի խոսքով, ինքն առանց խնդիրների անցել է հսկիչ անցակետը, իսկ ամուսնուն ձերբակալել են:
«Նրան ձերբակալեցին եւ թույլ չտվեցին դուրս գալ օդանավակայանից: Ես արագորեն անցա անցակետը, իսկ հետո տեսա, որ նա դեռեւս դուրս չի գալիս: Նրան մարդիկ մոտեցան ու խնդրեցին իրենց հետ գնալ: Արդեն երկու ժամ է անցել, իսկ նա դեռ չկա»,- պատմել է Ալյոնա Ստերլիգովան:
«Զվեսդա»-ի հաղորդմամբ, ռուսաստանցի գործարար Գերման Ստերլիգովին ձերբակալել են երկուշաբթի, Մոսկվայի Դոմոդեդովո օդանավակայանում: Այդ մասին տեղեկացրել էր նրա փաստաբան Արթուր Հայրապետովը: Նրա խոսքով, հնարավոր է՝ խոսքը ոչ թե միջազգային, այլ ԱՊՀ-ի մակարդակով միջպետական հետախուզության մասին է:
Ավելի վաղ հայտնի էր դարձել, որ Ինտերպոլի միջոցով Ստերլիգովի հետապնդումը դադարեցվել է: Գործարարը միջազգային հետախուզման մեջ էր 2015 թվականի հուլիսի 28-ից: Այն նախաձեռնել էր Ադրբեջանը, երբ հուլիսի սկզբին Ստերլիգովն ընտանիքի հետ Լեռնային Ղարաբաղ էր մեկնել:
Նրա փաստաբանը հիշեցրել է, որ ավելի վաղ պաշտոնական Բաքուն Գերման Ստերլիգովին անցանկալի անձ էր հայտարարել եւ ներառել իր սեւ ցուցակում՝ արգելելով երկիր նրա մուտքը: Դրանից մի քանի օր անց Ադրբեջանում ռուսաստանցի գործարարի դեմ քրեական գործ էր հարուցվել:
Ներկայում Ստերլիգովի փաստաբանները հայց են պատրաստում՝ ներկայացնելու Մարդու իրավունքների ստրասբուրգյան դատարան:
