Բաղրամյան պողոտայից այսօր՝ սեպտեմբերի 1-ին, բերման ենթարկված 6 ակտիվիստներից 5-ը ազատ են արձակվել: Այս մասին հայտարարեց Երևանի փոխոստիկանապետ Վալերի Օսիպյանը։ Լրագրողների հետ զրույցում նա նշեց, որ ինքն էլ է դեմ էլեկտրաէներգիայի թանկացմանը, սակայն դա չի նշանակում, որ թանկացման դեմ պետք է պայքարել նման ճանապարհով: Նրա խոսքով՝ ակտիվիստները արհեստական բախում են ստեղծում ոստիկանների հետ՝ հանրությանը փողոց հանելու համար: (ֆոտոռեպորտաժ)
«Իմ կարծիքով` մեր քաղաքացիները հրահրում և արհեստական բախում են ստեղծում ոստիկանների հետ՝ հանրությանը փողոց հանելու համար: Խնդիր չկա, լավ գործ եք անում, բայց արեք օրինաչափ: Ես էլ միանշանակ դեմ թանկացմանը, բայց դա չի նշանակում, որ ես էլ պետք է անեմ նույնը, ինչ-որ իրենք: Սահմանադրական եղանակով հասեք ձեր ուզածին»,-ասաց Վալերի Օսիպյանը:
Ակտիվիստներն այս պահին Բաղրամյան պողոտայում սպասում են, որ իրենց միանան ազատ արձակված ընկերները, որից հետո կորոշեն իրենց անելիքները:
Ավելի վաղ հաղորդել էինք, որ ոստիկանների հետ բախումների ժամանակ բերման էր ենթարկել հինգ ակտիվիստ։ Ցուցարարները հայտարարել են, որ եթե նրանք անհապաղ ազատ չարձակվեն, իրենք կփակեն Բաղրամյան պողոտան։
«Ոչ թալանին» նախաձեռնությունը հայտարարել է` այսօրվանից վերսկսում է պայքարը էլեկտրաէներգիայի թանկացման դեմ, քանի որ իրենց նախկին պահանջները չեն կատարվել:
Լուսանկարները՝ Արսեն Սարգսյանի /NEWS.am
