Ազգային փոքրամասնությունները իրենք կորոշեն, թե իրենց ներկայացուցիչներից ով է ներկայացվելու խորհրդարան։ Այս մասին սեպտեմբերի 4-ին կայացած խորհրդարանական լսումների ժամանակ հայտարարեց Հայաստանի սահմանադրական բարեփոխումների մասնագիտական հանձնաժողովի անդամ Հրայր Թովմասյանը՝ պատասխանելով «Հայաստանի քրդական ազգային խորհուրդ» ՀԿ ղեկավար Կնյազ Հասանովի հարցին։
Թովմասյանի խոսքով՝ դրա մեխանիզմները կընդգրկվեն Ընտրական օրենսգրքում։
«Քննարկվում էր նաեւ այն տարբերակը, որ ընտրության գնացող կուսակցությունները ազգային փոքրամասնությունների համար անցումային տեղեր պահեն։ Բայց մենք մտածում ենք, որ ավելի ճիշտ է, եթե այդ հարցը լուծեն ազգային փոքրամասնության ներկայացուցիչները։ Մեխանիզմները, կրկնում եմ, կպարզի արդեն օրենսդրությունը»,- հավելեց Թովմասյանը։