Էլեկտրաէներգիայի սակագնի բարձարցման դեմ բողոքող՝ «Ոչ թալանին» նախաձեռնության համար սպասելի էր «Դելոյթ եւ Տուշ» աուդիտորական ընկերության հաշվետվությունը, ըստ որի սակագինը բարձրացնելու՝ ՀԾԿՀ որոշումը հիմնավորված է:
«Աուդիտն արվել է այն փաստաթղթերի հիման վրա, որոնց հիմքով ՀԾԿՀ-ն որոշում էր կայացրել: Մենք շարունակում ենք պնդել, որ դրանք կեղծ հիմքեր են, կեղծ հիմքերով են նաեւ աուդիտն արել: Եթե նպատակ ունենային թանկացման հիմնավորվածությունն իսկապես բացահայտելու, ֆինանսականի փոխարեն տեխնիկական աուդիտ կանցկացնեին՝ ՀԷՑ-ում խորքային ուսումնասիրություններ կանեին: Այդ ժամանակ քրեական հանցագործություններ էլ կբացահայտվեին»,- NEWS.am-ի հետ զրույցում ասաց նախաձեռնության անդամներից Մաքսիմ Սարգսյանը:
Մաքսիմ Սարգսյանը նշեց, որ նախաձեռնությունը դեռ ուսումնասիրում է հաշվետվությունը եւ առաջիկայում հայտարարություն կանի դրա վերաբերյալ:
Նշենք, որ հրապարակվել է «Հայաստանի էլեկտրական ցանցեր» ՓԲԸ-ում իրականացվող աուդիտի 1-ին փուլի արդյունքները, ըստ որոնց էլեկտրաէներգիայի սակագինը բարձրացնելու՝ ՀԾԿՀ որոշումը հիմնավորված է: Հոկտեմբերի վերջին կավարտվի աուդիտի երկրորդ փուլը, ապա երրորդ փուլը:
Հիշեցնենք, որ չնայած բողոքի բազմաթիվ ակցիաներին՝ ՀԾԿՀ-ն հունիսի 17-ին էլեկտրաէներգիայի սակագինը 6.93 դրամով բարձրացնելու որոշում կայացրեց: Բնակչության համար էլէներգիայի 1 կվտ/ժամի ցերեկային սակագինը կազմում է 48.78, գիշերայինը՝ 38.78 դրամ: Որոշումն ուժի մեջ է մտել օգոստոսի 1-ից: Նախքան ՀԷՑ-ում աուդիտի ավարտը ավելացված 6.93 դրամը բնակչության փոխարեն կվճարի պետությունը: