Սահմանադրական բարեփոխումների դեմ պայքարող «Ոչ»-ի ճակատի հանրահավաքը այսօր՝ հոկտեմբերի 2-ին, Ազատության հրապարակում սակավաթիվ էր, որովհետեւ հարթակին կանգնած են մարդիկ, որոնք մեկ անգամ արդեն հուսախաբ են արել քաղաքացիներին։ Այս մասին NEWS.am-ի հետ զրույցում ասաց քաղաքական վերլուծաբան, «Ռազմավարական և ազգային հետազոտությունների հայկական կենտրոնի» տնօրեն Մանվել Սարգսյանը:
«Մինչեւ այս պրոբլեմների ի հայտ գալը գործ ունեինք Գագիկ Ծառուկյանի հետ կապված քաղաքական պրոցեսի հետ: Այնպես ստացվեց, որ նույն մարդիկ, որ փորձում էին ծավալել այդ պրոցեսը, հիմա այս պրոցեսով են զբաղվում, նույն երիտասարդներն են, նրանց ո՞վ պիտի հավատա: Ասում էին՝ փոփոխություններ են լինելու, բայց չեղան: Այդ պատճառով հանրության շրջանում հավատ չկա»,- ասաց նա:
Մանվել Սարգսյանի խոսքով՝ եթե «Ոչ»-ի ճակատը ղեկավարվեր ամբողջությամբ նոր ուժերի կողմից, հակառակ արդյունքը կլիներ:
«Եթե սահմանադրական բարեփոխումներին «ոչ» ասելու խնդրով զբաղվեին լրիվ թարմ մարդիկ, ավելի հզոր ալիք կլիներ: Այսօր հրապարակում տասնյակ հազարավոր մարդկանց կտեսնեինք: Խնդիրը շատ լուրջ է եւ ցավալի է, որ նման իրավիճակի առաջ ենք կանգնել»,- ասաց նա:
Հանրահավաքին կուսակցությունների առաջնորդների բացակայությունը քաղաքական վերլուծաբանը բացատրում է նրանով, որ նրանք ասելիք չունեին:
«Համոզված էին, որ անիմաստ բան է, դրա համար չէին եկել»,- նշեց նա:
Նշենք, որ սահմանադրական փոփոխությունների դեմ պայքարին միացած քաղաքական ուժերի առաջնորդներն այսօր հիմնականում Ազատության հրապարակում չէին. ՀԺԿ-ից ներկա էր Ստեփան Դեմիրճյանը, ՀԱԿ-ից` խմբակցության պատգամավորներ Արամ Մանուկյանն ու Գագիկ Ջհանգիրյանը, իսկ «Ժառանգությունից»՝ կուսակցության փոխնախագահ Արմեն Մարտիրոսյանը: Սա «Ոչ»–ի ճակատի առաջին հավաքն էր Երեւանում, առաջինը տեղի էր ունեցել Գյումրիում։
Հիշեցնենք, որ սահմանադրական բարեփոխումների դեմ հանդես եկող քաղաքական ուժերի ձեւավորած «Ոչ»-ի ճակատի առաջին հանրահավաքը տեղի է ունեցել Գյումրիում սեպտեմբերի 25–ին։ Նախաձեռնությանն են միացել «Ժառանգություն» կուսակցությունը, ՀԱԿ-ը, «Հիմնադիր խորհրդարանը», ՀԺԿ-ն,ԱԻՄ–ը եւ այլ քաղաքական ու հասարակական կազմակերպություններ:
Սահմանադրության նոր նախագիծը, որով նախատեսվում է անցում կառավարման խորհրդարանական համակարգի, արդեն ուղարկվել է ԱԺ: Հոկտեմբերի 5-ին նախագիծը կդրվի քվեարկության: Սպասվում է, որ հանրաքվեն կանցկացվի դեկտեմբերի առաջին տասնօրյակում: