Սահմանադրական փոփոխությունների դեմ հանդես եկող քաղաքական ու քաղաքացիական ուժերի «Ոչ»-ի ճակատի մասնակիցների եւ ոստիկանների միջեւ այսօր` հոկտեմբերի 5-ին բախում է տեղի ունեցել Ազգային ժողովի դիմաց, երբ ոստիկանները փորձել են պոկել ԱԺ ճաղավանդակին փակցրած «Ոչ գրությամբ» մեծ պաստառը։
NEWS.am–ի թղթակիցը հաղորդում է, որ իրավիճակն այժմ էլ լարված է։ Անընդհատ բախումներ են տեղի ունենում ոստիկանների հետ, որոնք թույլ չեն տալիս ցուցարարներին բարձրանալ ճաղավանդակին ու փակցնել պաստառը։ Քիչ առաջ բերման ենթարկեցին մեկ մարդու։
Ցուցարարների մոտ քիչ առաջ իջավ ԱԺ ՀԱԿ խմբակցութան ղեկավար Լեւոն Զուրաբյանը, որն այժմ բանակցում է Երեւանի փոխոստիկանապետ Օսիպյանի հետ` փորձելով հասկանալ, թե ինչ հիմքով են ոստիկանները խոչընդոտում ցուցարարների գործողությունները։
Նշենք, որ Ազատության հրապարակից երթը դեպի Ազգային ժողով նույնպես սկսվեց միջադեպով. Բաղրամյան պողոտայի սկզբնամասում ոստիկանները շղթա կազմած փորձում էին թույլ չտալ ակցիայի կազմակերպիչներին քայլել փողոցով` պահանջելով երթն անցակացնել միայն մայթով, կարճատև քննարկումից հետո ակցիայի մասնակիցներն առաջ շարժվեցին` փակելով երթևեկելի փողոցի մի մասը: Ոստիկանները պատ կազմած թույլ չէին տալիս, որ երթի մասնակիցները փողոցը փակեն ամբողջությամբ, երթևեկությունը որոշ ժամանակով դադարեցվեց:
Այս պահին ակցիայի մասնակիցներն Ազգային ժողովի դիմաց կանգնած սպասում են Ազգային ժողովում նոր սահմանադրության նախագծի քվեարկության արդյունքներին:
Նշենք, որ «Ոչ»-ի ճակատը երեւանյան առաջին հանրահավաք-երթն անցկացրեց հոկտեմբերի 2-ին: Նախաձեռնությանն են միացել «Ժառանգություն» կուսակցությունը, ՀԱԿ-ը, «Հիմնադիր խորհրդարանը», ՀԺԿ-ն,ԱԻՄ–ը եւ այլ քաղաքական ու հասարակական կազմակերպություններ:
Սպասվում է, որ Սահմանադրության հանրաքվեն կանցկացվի դեկտեմբերի առաջին տասնօրյակում: