Cassini կայանը լուսանկարել է Սատուրնի արբանյակներ Պանդորան ու Տիտանը: Պանդորան Սատուրնի բնական արբանյակն է (երբեմն այն անվանում են Սատուրն XVII), որն ազդում է նրա օղակներից մեկի վրա: Այս մասին հայտնում է ՆԱՍԱ-ի կայքը:
Թեեւ լուսանկարների վրա Տիտանն ավելի մոտ է թվում կայանին, քան Պանդորան, բայց իրականում լուսանկարման պահին Պանդորան եռակի մոտ էր Cassini-ին, քան Տիտանը՝ Սատուրնի խոշորագույն արբանյակը: Այդ խաբուսիկ տպավորությունը պայմանավորված է երկնային մարմինների չափերով: Տիտանի տրամագիծը 5150 կմ է, իսկ Պանդորայինը՝ 81 կմ:
Լուսանկարը Cassini կայանն արել էր 2015 թ. հուլիսի 4-ին՝ Տիտանից 1.9 միլիոն կմ, իսկ Պանդորայից 698 հազար կմ հեռավորության վրա: Տիտանը լուսանկարվել է մեկ պիքսելի համար 12 կմ՝ իսկ Պանդորան՝ 4 կմ թողունակությամբ: