Նոր Ընտրական օրենսգիրք կազմելիս իշխանությունները պետք է հաշվի նստեն ընդդիմության հետ: Այդ մասին հոկտեմբերի 6-ին ՀՀ Ազգային ժողովում լրագրողների հետ զրույցում նշել է ՀՅԴ խմբակցության քարտուղար Աղվան Վարդանյանը:
Նա հիշեցրել է, որ օրենսգրքի նոր խմբագրությունը պետք է ընդունվի ձայների 3/5-ով, քանի որ այն օրգանական օրենքների շարքին է պատկանում (ըստ Սահմանադրական փոփոխությունների, որոնք ընդունվել են հոկտեմբերի 5-ին) :
Ձայների 3/5 -ը նշանակում է 131-ից 79 ձայն: ՀՀԿ-ն այդքան ձայն չունի: Հետեւաբար չի կարողանա միայն իր ուժերով անցկացնել այդ օրենսգիրքը, հավելեց պատգամավորը:
«Եթե ընդդիմությունն իրեն դրսեւորի որպես ընդդիմություն, իր քաղաքական իրական շահերը հանուն որեւէ այլ բանի չզիջի, ապա մենք կունենանք հրաշալի Ընտրական օրենսգիրք, որի դեպքում նոր խորհրդարանում իշխանությունն այլեւս չի կարողանա զբաղեցնել վճռորոշ մեծամասնությունը: Իսկ եթե ընդդիմությունից որեւէ մեկն իրեն այլ կերպ պահի ՝ հարցերը նրան ուղղեք»,-հավելեց Վարդանյանը:
Հիշեցնենք, որ ըստ Սահմանադրության, նոր Ընտրական օրենսգիրքը պետք է խորհրդարանական ընտրություններն անցկացնի 100 տոկոսանոց համամասնական համակարգի:
