Միացյալ Նահանգները բարձր են գնահատում Հայաստանի հետ գործընկերությունը։ Այդ մասին ԱԳ նախարար Էդվարդ Նալբանդյանի հետ հանդիպմանն ասել է ԱՄՆ պաշտպանության քարտուղարի փոխտեղակալ Էնն Վիկտովսկին։
Ինչպես NEWS.am-ին հայտնեցին ԱԳՆ մամուլի ծառայությունից, ողջունելով հյուրին՝ նախարար Նալբանդյանը գոհունակությամբ նշեց, որ հայ-ամերիկյան գործընկերությունը տարբեր, ներառյալ պաշտպանական եւ անվտանգության բնագավառներում, զարգանում է։ ԱԳՆ ղեկավարը արժեւորեց Հայաստանի խաղաղապահ կարողությունների զարգացմանը ցուցաբերած Միացյալ Նահանգների շարունակական աջակցությունը:
Շնորհակալություն հայտնելով ընդունելության համար` Էնն Վիկտովսկին ասաց, որ Միացյալ Նահանգները բարձր են գնահատում Հայաստանի հետ գործընկերությունը, պաշտպանական բնագավառում փոխգործակցությունը եւ Հայաստանի կարեւոր ներդրումը խաղաղապահ գործողություններում։ ԱՄՆ պաշտպանության քարտուղարի փոխտեղակալը շնորհակալություն հայտնեց ԱՄՆ նախագահ Բարաք Օբամայի հրավերով Նյու Յորքում կայացած Խաղաղապահության հարցերով Առաջնորդների գագաթաժողովին Հայաստանի Նախագահ Սերժ Սարգսյանի մասնակցության համար։
Էնն Վիտկովսկին կարեւորեց Երեւանում «Մարտահրավերներ ամենամյա ֆորում 2015»-ի անցկացումը, որը խաղաղապահության վերաբերյալ տարաբնույթ հարցերի քննարկման լավ հարթակ հանդիսացավ։
Զրուցակիցները մտքեր փոխանակեցին Հայաստան - ՆԱՏՕ փոխգործակցության հարցերի շուրջ։
Հայաստանի արտաքին քաղաքական գերատեսչության ղեկավարը ներկայացրեց ղարաբաղյան հիմնախնդրի կարգավորման ուղղությամբ Հայաստանի եւ ԵԱՀԿ Մինսկի խմբի համանախագահների կողմից գործադրվող ջանքերը։
