«ՈՉ»-ի ճակատի հաջորդ հանրահավաքը նշանակվել է հոկտեմբերի 30-ին, որից էլ պարզ է դառնում, որ «Չեք անցկացնի» նախաձեռնության երիտասարդների մեջ հավանաբար արդեն հասցրել են նստել «տրոյական ձիերը»: Այս մասին NEWS.am-ի հետ զրույցում ասաց ԱԻՄ առաջնորդ Պարույր Հայրիկյանը՝ նշելով, որ սահմանադրական փոփոխությունների նախագծի դեմ նման ձեւով պայքարելով «ՈՉ»-ի ճակատը ոչնչի չի հասնի:

«Այս երիտասարդների մեջ հավանաբար  խցկված են «տրոյական ձիեր», այսինքն լրտեսներ, դրա համար էլ նման որոշում են կայացրել՝ հանրահավաքը նշանակել հոկտեմբերի 30-ին: Թող իմանան, որ քաղաքացիներն իրազեկված են ու հեռավոր գյուղերում աչքից հեռու հանրահավաք անցկացնելը ոչինչ էլ չի տալու: Ամեն օր է պետք պայքարել, ամեն դեպքում իրենց իրավունքն է, ջահելների հայտարարությունն է, բայց ես պարտավոր եմ արձանագրել, որ եթե հռչակագրի տակ բոլորս ենք ստորագրել, բոլորս պետք է մտահոգվենք եւ աշխատենք: Չեմ կարող չասել, որ տղաները սխալ են գործում, պետք չէ, ուշացնել գործը»,-ասաց ԱԻՄ առաջնորդը:

Հիշեցնենք, որ Հայաստանի Ազգային ժողովն 2015թ. հոկտեմբերի 5-ին, ընդունել է  «ՀՀ նախագահի համար ընդունելի առաջարկների հիման ՀՀ սահմանադրության փոփոխությունների նախագիծը հանրաքվեի դնելուն համաձայնություն տալու մասին ԱԺ որոշման նախագիծը»: Որոշմանը կողմ է քվեարկել 104, դեմ՝ 10, ձեռնպահ` 3 պատգամավոր:

Սահմանադրական փոփոխությունների նախագծով նախատեսվում է անցում կատարել կառավարման խորհրդարանական համակարգին եւ համամասնական 100 տոկոսանոց ընտրակարգին: