Դեկտեմբերի 6-ին մենք իշխանություն չենք ընտրում, ոչ էլ իշխանության դեմ ենք պայքարում: Սա Սահմանադրության փոփոխությունների հանրաքվե է: Այս մասին այսօր՝ նոյեմբերի 21-ին, Սահմանադրական փոփոխություններին նվիրված «Իրապատում» հեռուստանախագծի շրջանակում Սպիտակում կայացած հանդիպմանն ասել է ՀՅԴ ներկայացուցիչ Արթուր Եղիազարյանը:
«Եթե գնանք եւ ասենք «ոչ», ի՞նչ է փոխվելու: Իշխանությունը կասի՝ չուզեցիք փոփոխություն, ուրեմն ոնց կա, էդպես էլ կմնա»,- նշել է նա: Ըստ Եղիազարյանի՝ այդ բարեփոխումներին կողմնակից են բազմաթիվ ընդդիմադիր ուժեր: «Սա կոսմետիկ փոփոխություն չէ, այլ արմատական փոփոխում: 95-ին գրված Սահմանադրությունը մեկ անձի հագով կարված սահմանադրություն էր, իսկ սա արմատապես փոխում է կառավարման համակարգը»,- նշել է նա:
«Ոչ»-ի կողմնակից, «Հայազն» կուսակցության անդամ Արմեն Մկրտչյանը արձանագրեց, որ Հայաստանում սահմանադրական փոփոխությունների նկատմամբ անտարբերություն կա, իսկ Լոռու մարզի Սպիտակ քաղաքում անտարբերությունն ավելի մեծ է: «Սա հարմար նախագիծ է, որ Սերժ Սարգսյանը 2018-ից հետո իր ձեռքում պահի իշխանությունը որպես ՀՀԿ նախագահ, բայց չունենա որեւէ պարտականություն երկրի առջեւ: Հիմա մեզ մի ընտրություն է պետք՝ արտահայտո՞ւմ ենք գոհունակություն իշխանությունից, թե՞ ոչ»,- նշել է նա:
ԱԺ ՀՀԿ-ական պատգամավոր Սամվել Ֆարմանյանի կարծիքով, սահմանադրական փոփոխություններին հիմնականում դեմ են այն կուսակցությունները, որոնք ունեն ընդգծված առաջնորդ:
Նշենք, որ «Հյուսիս» ուղղության «Այո»-ի մասնակիցներն են՝ ԱԺ «Հանրապետական» խմբակցության պատգամավորներ Մարգարիտ Եսայանը, Սամվել Ֆարմանյանը, ԱԺ ԲՀԿ խմբակցության պատգամավոր Միքայել Մելքումյանը, ՀՅԴ անդամ Արթուր Եղիազարյանը: Իսկ «Ոչ»-ի ճակատից են «Հայազն» կուսակցության ներկայացուցիչ Արմեն Մկրտչյանը, «Ազատ Դեմոկրատներ» կուսակցության ներկայացուցիչ Նարեկ Այվազյանը, Պետրոս Մակեյանը եւ Վարդան Խաչատրյանը, ՀԱԿ ներկայացուցիչ Հրանտ Բագրատյանը:
