Արցախի Հանրապետության վարչապետ Արայիկ Հարությունյանը նոյեմբերի 21-ին ԱՄՆ Նեւադա նահանգի իշխանության ներկայացուցիչների հետ հանդիպման ժամանակ ներկայացրել է ղարաբաղյան հակամարտության շուրջ տեղի ունեցող զարգացումները:
ԼՂՀ կառավարությունից NEWS.am-ին հայտնում են, որ Արայիկ Հարությունյանը նոյեմբերի 21-ին այցելել է ԱՄՆ Նեւադա նահանգ եւ մի շարք հանդիպումներ ունեցել այնտեղ:
Վարչապետը ծաղիկներ է խոնարհել հայոց ցեղասպանության զոհերի հիշատակին նվիրված՝ Նեւադայում վերջերս բացված հուշարձանին՝ կարեւորելով ցեղասպանության միջազգային ճանաչման եւ դատապարտման նշանակությունը թե՛ հայ ազգի, եւ թե՛ համայն մարդկության համար: Արայիկ Հարությունյանն այնուհետեւ հանդիպել է այդ նահանգում Հայաստանի Հանրապետության պատվավոր հյուպատոս Անդի Արմենյանին եւ համայնքի մի շարք ներկայացուցիչների՝ նրանց հետ քննարկելով ազգապահպանությանը եւ Արցախ-սփյուռք հարաբերություններին վերաբերող որոշ հարցեր:
Ա. Հարությունյանը հանդիպում է ունեցել նաեւ Նեւադայի օրենսդիր մարմնի եւ տեղական ինքնակառավարման մարմինների մի խումբ ներկայացուցիչների հետ: Վարչապետը նրանց ներկայացրել է Արցախի հաջողություններն ու խնդիրները պետականաշինության եւ տնտեսության զարգացման գործընթացներում, ինչպես նաեւ՝ ղարաբաղյան հակամարտության շուրջ տեղի ունեցող զարգացումները եւ ընդհանուր տարածաշրջանի իրավիճակը: Կողմերը քննարկել են երկուստեք հետաքրքրության մի շարք հարցեր, ձեռք բերել հետագա համագործակցության վերաբերյալ պայմանավորվածություններ:
Համայնքի կողմից իր պատվին կազմակերպված ընդունելության ժամանակ վարչապետ Հարությունյանն ընդգծել է ազգային նշանակության հարցերում սփյուռքի ակտիվ մասնակցության կարեւորությունը՝ կոչ անելով ներկաներին մասնակցել առաջիկա հեռուստամարաթոնին՝ հանուն հայրենիքի շարունակական զարգացման:
