Նոր սահմանադրությունով ամրագրվում է, որ պետությունը պարտավոր է իրականացնել հայրենադարձության ծրագիր: Այս մասին այսօր՝ նոյեմբերի 23-ին, Արարատի մարզի Արտաշատ քաղաքում սահմանադրական փոփոխություններին նվիրված «Իրապատում» հեռուստանախագծի շրջանակում ասել է ԱԺ աշխատակազմի ղեկավար, գլխավոր քարտուղար Հրայր Թովմասյանը, որը ներկայացնում է «Այո»-ի ճակատը:
«Մենք, ցավոք, ունենք արտագաղթ: Առաջին անգամ Սահմանադրությունով ամրագրում ենք, որ պետությունը պետք է իրականացնի հայրենադարձության ծրագիր: Այսինքն՝ անկախ, թե ով է լինելու կառավարությունում, պետք է իրակացնեն այդ ծրագրերն ինչպես 60-ականների կեսերին»,- ասել է նա:
Հրայր Թովմասյանի խոսքով՝ սահմանադրական փոփոխությունները դրական են անդրադառնում նաեւ դատական համակարգի վրա: Նա նշել է նաեւ, որ սահմանդրական փոփոխություններով սահանվում է, որ կառավարությունը երեք տեսակի հաշվետվություն պետք է ներկայացնի ժողովրդին:
«Պետք է ներկայացնի հաշվետվություն բյուջեի վերաբերյալ, իր իրականացրած ծրագրերի վերաբերյալ, սոցիալական, տնտեսական, մշակութային ոլորտում իրականացրած քաղաքականության մասին»,- ասել է նա՝ նշելով, որ նոր Սահմանադրության ընդունումից հետո մենք ունենալու ենք ավելի հզոր հայրենիք, արդյունավետ կառավարություն, իրականություն է դառնալու այն սահմանադրական նորմը, որ մարդը, նրա իրավունքներն ու ազատությունները բարձրագույն արժեք են:
Նշենք, որ «Հարավ» ուղղության «Այո»-ի մասնակիցներն են՝ Սահմանադրական բարեփոխումների մասնագիտական հանձնաժողովի անդամ Հրայր Թովմասյանը, Հայաստանի PR ասոցիացիայի նախագահ Արման Սաղաթելյանը, ԱԺ «Հանրապետական» խմբակցության պատգամավորներ Կարինե Աճեմյանը, Վարդան Այվազյանը: Իսկ «Ոչ»-ի ճակատից են հասարակական կարծիքի ուսումնասիրության կենտրոնի նախագահ Թամարա Գեւորգյանը, քաղաքական գործիչ Ազատ Արշակյանը, ակտիվիստ Վաղինակ Շուշանյանը, ԱԺ պատգամավոր Հրանտ Բագրատյանը:
Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի 6-ին:
