Ազգային ժողովի փոխնախագահ Հերմինե Նաղդալյանը վստահեցնում է, որ դեկտեմբերի 6-ին Սահմանադրական փոփոխությունների հանրաքվեն լինելու է հնարավորինս օրինակելի, թափանցիկ եւ արդար:
Այսօր՝ նոյեմբերի 26-ին, ՀՀԿ ԳՄ նիստից հետո լրագրողների հետ հանդիպմանը ԱԺ փոխնախագահն ընդգծեց, որ իրենք անելու են հնարավորինը՝ եվրոպական չափանիշներին համապատասխան ընտրություն անցկացնելու համար:
«Հանրապետական կուսակցությունը պատրաստվում է հանրաքվեին, մեր համախոհներն ու կուսակցության ներկայացուցիչները քարոզարշավներ են իրականացնում մարզերում եւ մայրաքաղաքում: Ես համոզված եմ, որ հանրաքվեն լինելու է հնարավորինս օրինակելի, թափանցիկ, ազատ եւ արդար: Մենք հաստատաբար ունենալու ենք լեգիտիմ արդյունքներ եւ օրինակելի ընտրություն»,- ասաց նա:
Լրագրողների հարցին՝ արդյոք դեկտեմբերի 6-ին ՀՀ բոլոր քաղաքացիները գնալու են հանրաքվեին՝ ամբողջովին իրազեկված Սահմանադրական փոփոխությունների մասին, Հերմինե Նաղդալյանը դժվարացավ որեւէ հստակ պատասխան տալ. «Կարեւոր է երկու հանգամանք՝ ցանկություն եւ հնարավորություն: Ես չեմ կարող ասել՝ արդյոք մեր բոլոր քաղաքացիները ցանկություն եւ հնարավորություն ունեն՝ ծանոթանալու, հասկանալու նախագիծը»:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին: Փոփոխություններով առաջարկվում է անցում կատարել կառավարման խորհրդարանական համակարգին:
