Անկարան Թուրքիայի եւ Սիրիայի սահմանամերձ շրջաններում դիտավորյալ կեղծում է թուրքմենների քանակը։ Այս մասին նոյեմբերի 30-ին լրագրողներին ասել է Հայոց ցեղասպանության թանգարան-ինստիտուտի տնօրեն, արեւելագետ Սուրեն Մանուկյանը։
Նրա խոսքով՝ Թուրքիան նշում է, որ այդ շրջաններում ապրում է 1,5-3 մլն թուրքմեն։ Սակայն այդ թիվն անգամ մոտ չէ իրականությանը։ Լավագույն դեպքում այնտեղ ապրում է 100-200 հազար թուրքմեն։ «Բայց Թուրքիան նման բարձր թվեր է ներկայացնում, որպեսզի հետո, երբ Սիրիայում ավարտվեն ռազմական գործողությունները, առիթ ունենա սահմանին բուֆերային գոտի պահանջի։ Այդ շրջանում թուրքմենների թուրքամետ կողմնորոշումն ակնհայտ է։ Նրանց խմբավորումները Թուրքիայից զենք եւ աջակցություն են ստանում եւ թշնամաբար են տրամադրված Բաշար Ասադի նկատմամբ։ Իսկ Լաթաքիայից հյուսիս՝ հենց այնտեղ, որտեղ խոցվել էր Սու-24 ռուսական ռմբակոծիչը, նրանք կոմպակտ խմբավորում են ստեղծել»,- նշել է Մանուկյանը։
Հիշեցնենք, որ նախօրեին Թուրքիայից Սիրիա ահաբեկիչներին մատակարարումների փաստը բացահայտած հրապարակման համար ձերբակալվել էր Cumhurriyet թերթի խմբագիր Ջան Դյունդարն ու թղթակից Էրդեմ Գյուլը։