նախընտրելի դարձնել2015թ. սեպտեմբերի 3-ին հակառակորդի գնդակից զոհված 40-ամյա պայմանագրային զինծառայող Հայկ Թեւոյանի երկու մանկահասակ երեխաները՝ 6-ամյա Անահիտը եւ 5-ամյա Արամը, հավատում են Ձմեռ պապի գոյությանը: Ամանորին Հայկի երեխաները մյուս երեխաների նման ոչ թե խաղալիքներ են ուզել Ձմեռ պապից, այլ սահմանին զոհված իրենց հորը:
Փոքրիկ Անահիտը ասում է՝ երգող տիկնիկ էլ է ուզում Ձմեռ պապից, բայց նրան այդ ցանկությամբ նամակ չի գրել:
«Մամային ասել եմ՝ նամակ գրի Ձմեռ պապիկին, որ պապային բերի»,- ամոթխած ասում է Անահիտը:
Հայկին վերադարձնելու նույն ցանկությամբ մոր օգնությամբ Ձմեռ պապին նամակ է գրել նաեւ Հայկի 5-ամյա որդին՝ Արամը:
Արամը, որը տան կրտսեր զավակն է եւ Հայկի ամենասիրելին, կարոտում է հորը, մտածում է՝ նա Ղարաբաղում է, համբերում է, վստահ է, որ շուտով գալու է, իրեն զենք է բերելու, կամ իրեն տանելու է Արցախ:
«Արամը միայն հոր մասին է խոսում, անընդհատ ասում է՝ ե՞րբ է պապան գալու, ինքը Ձմեռ պապից ուրիշ բան չի ուզում, հորն է ուզում»,-ասում է Հայկի այրին՝ Ջավահիր Թեւոյանը:
Հայկի 13-ամյա որդին՝ Կառլենը, սակայն, չի հավատում Ձմեռ պապի գոյությանը, երազանքներ չունի:
Կառլենը երկար նայում է հոր լուսանկարին, աչքերում արցունքներ են հայտնվում, սակայն տղամարդու պես զսպում է արցունքները եւ ասում՝ պիտի ծառայեմ:
«Պիտի ծառայեմ հողիս, հայրենիքիս ու հորս վրեժը լուծեմ»,-ասում է Կառլենը:
Ավելի վաղ հաղորդել էինք, որ սեպտեմբերի 2–ի լույս 3–ի գիշերը հակառակորդի գնդակոծության հետեւանքով սպանվել է 40-ամյա պայմանագրային զինծառայող Հայկ Թեւոյանը: Պայմանագրային զինծառայողը 5 երեխա ունի` որից 3-ն անչափահաս են, ընտանիքն էլ սոցիալապես անապահով պայմաններում է ապրում, նպաստառու է: Հայկ Թեւոյանը ընտանիքի միակ աշխատողն էր:
Հայկ Թեւոյանը Հայրենիքի սահմանների պաշտպանության գործում ցուցաբերած խիզախության եւ անձնական արիության համար հետմահու պարգեւատրվել է Մարտական ծառայության մեդալով:
