Մինչ Թուրքիայի նախագահը տարածաշրջանում իր ազդեցությունը վերականգնելու ունայն փորձեր է անում, սեփական երկրում իրավիճակը լարման գագաթնակետին է հասել: Երեւում է` նրա երկու ամենակարեւոր խնդիրները` Ռուսաստանի հետ տարաձայնությունները եւ քրդերի դեմ պայքարը կարող են Էրդողանի համար ամենասարսափելի մղձավանջի վերածվել, նշում է գերմանական Deutschlandfunk ռադիոյի լրագրող Ռեյնարդ Բաումգարտենը:
Սիրիայում ռուսաստանյան ռազմական գործողությունը խառնել է Էրդողանի բոլոր խաղաթղթերը եւ արմատապես փոխել է տարածաշրջանում ուժերի դասավորությունը: Հանկարծ պարզ է դարձել, որ Հյուսիսային Սիրիայի վրա ոչ թռիչքային գոտու ստեղծումը ընդհանրապես անհնար է, իսկ թուրք-սիրիական սահմանի երկայնքով 120 կմ երկարությամբ անվտանգության գոտու ստեղծման վերաբերյալ Անկարայի երազանքները կոչված չեն իրականանալու: Բացի այդ, Թուրքիայի նախագահը ստիպված է եղել ընդունել այն փաստը, որ սիրիացի ապստամբներին աջակցելով` ինքը ստիպված է հաշվի նստել ռուսաստանյան ուժերի դիրքորոշման հետ, նշում է Բաումգարտենը:
Իր ներքաղաքական իշխանության հիմնական սպառնալիք հանդիսացող սիրիացի քրդերի նկատմամբ հեշտ հաշվեհարդարի Էդողանի պլանները փլուզվել են: Հերիք է նրանք միավորվեն թուրքական քրդերի հետ, եւ ՔԲԿ-ի դեմ պայքարը, որը նա սկսել է սեփական քաղաքական շահի համար, կսկսի վտանգավոր դրսեւորումներ ստանալ, որովհետեւ Հարավ-Արեւելյան Անատոլիայում քաղաքացիական պատերազմը, որը պաշտոնապես հակաահաբեկչական գործողություն է հռչակվել, շատ քրդերի կողմից ընկալվում է որպես էթնիկ զտում: Թուրքիայի նախագահն իր վրա միանգամից չափից շատ խնդիրներ է բարդել` սրելով հակասությունները Ռուսաստանի հետ եւ իր երկրում հակամարտություն հրահրելով` նա խոցելի է դարձել նաեւ ներքին քաղաքականության մեջ: Նա հաշվի չի առել, որ Մոսկվան կարող է դաշինք կնքել քրդերի հետ, որոնք ներկայացել են որպես տարածաշրջանային նշանակալի ուժ, որն ի վիճակի է հակահարված տալ Իսլամական պետությանը (ԻՊ) եւ դրանով իսկ իրականացնել Էրդողանի քաղաքական կարիերայի համար ամենասարսափելի սցենարը, տեղեկացնում է ՄՌԻԱ Նովոստին»:
