Ռուս դիտորդներին Թուրքիայի տարածքով թռիչքի մերժումը Անկարայի փորձն է` թաքցնելու Սիրիայի հետ սահմանին անօրինական ռազմական գործունեությունը: Այդ մասին լրագրողներին հայտնել է ՌԴ Պաշտպանության նախարարության պաշտոնական ներկայացուցիչ Իգոր Կոնաշենկովը, տեղեկացնում է ՏԱՍՍ-ը:
«ՆԱՏՕ-ի անդամ հանդիսացող երկրի նման քայլերը բոլորովին չեն նպաստում Եվրոպայում վստահության եւ անվտանգության ամրապնդմանը: Թուրքիայի գործողությունները գնահատում ենք, որպես վտանգավոր նախատիպ եւ Սիրիայի հետ սահմանին ռազմական անօրինական գործունեությունը թաքցնելու փորձ», - ասել է Կոնաշենկովը: Թուրքիայի տարածքի վրայով ռուս զինվորականների դիտորդական թռիչքի չեղյալ համարման մասին հայտնի է դարձել փետրվարի 3-ին: Ինչպես պատմել է ՌԴ Պաշտպանության նախարարության Պայմանագրերի կատարման վերահսկողության վարչության պետ Սերգեյ Ռիժկովը, թռիչքի երթուղին ենթադրում էր, ի թիվս այլ բաների, սահմանամերձ այն շրջանների եւ օդանավակայանների դիտարկում, որտեղ կենտրոնացած է ՆԱՏՕ-ի երկրների ավիացիան: Նրա խոսքով, ռուսական առաքելության Թուրքիա ժամանումից եւ դիտորդական թռիչքի երթուղու հայտարարումից հետո թուրք զինվորականները մերժել են դրա անցկացումը` վկայակոչելով թուրքական ԱԳՆ-ի հրահանգը:
