Մի շարք ոլորտներում հյուսիսատլանտյան կառույցների եւ ՌԴ-ի համագործակցությունը զիջում է նույնիսկ սառը պատերազմի ժամանակաշրջանի համեմատությամբ: Այդ մասին հայտնել է ՌԴ ԱԳ նախարար Սերգեյ Լավրովը` ելույթ ունենալով Մյունխենյան անվտանգության համաժողովին, տեղեկացնում է ՏԱՍՍ-ը:
«Կարծում եմ, բոլորի համար պարզ է, որ փոխադարձաբար միահյուսված ճգնաժամերի ծայրաստիճան բարդությունը համատեղ համաձայնեցված աշխատանք է պահանջում, ասել է նախարարը: Սակայն կոլեկտիվ ջանքերի ճանապարհին արհեստական խոչընդոտներ են դրվում, ինչպես օրինակ ՆԱՏՕ-ի եւ ԵՄ-ի հրաժարումը Ռուսաստանի հետ լիարժեք համագործակցությունից, թշնամու կերպարի կառուցումը, սպառազինությունների ծավալումը` հավերժացնելու Եվրոպայում այն բաժանարար գծերը, որոնք Արեւմուտքը հանդիսավոր կերխով խոստացել էր վերացնել: Ըստ ամենայնի, հին բնազդները դեռեւս շատ ու շատ կենսունակ են»:
«Այսօր որոշ ոլորտներում հյուսիսատլանտյան կառույցների եւ մեր երկրի միջեւ համագործակցությունը զիջում է նույնիսկ սառը պատերազմի ժամանակաշրջանի համեմատ, նշել է Լավրովը: Էլ չեմ խոսում, որ դարձյալ շրջանառության մեջ են դրվել գաղափարախոսական դիմակայության կաղապարատիպերը, որոնց կոնցեպտուալ հիմքը դադարել է գոյություն ունենալ դեռեւս քառորդ դար առաջ: Ժամանակի տարբերանշանն է դարձել գաղափարախոսության եւ իրական քաղաքականության միախառնումը ի վնաս միջազգային առանցքային խնդիրների լուծման հեռանկարների»»:
Շատ պայմանավորվածություններ չեն իրականացվում երկրների` միակողմանի օգուտ ստանալու ցանկության պատճառով, նշել է ՌԴ արտգործնախարարը: «Մյունխենում մեր հանդիպումներին մենք ամեն անգամ արձանագրում ենք, որ եվրոպական անվտանգության ոլորտում եւ աշխարհում իրավիճակն ընդհանուր առմամբ անբավարար է զարգանում, ասել է նա: Քննարկում ենք քայլեր, որոնք կարող էին նպաստել իրավիճակի շտկմանը: Բայց դժբախտաբար իրադարձությունների ուղղվածության վեկտորում սկզբունքային փոփոխություններ տեղ չեն ունենում»:
«Իհարկե ինչ-որ բան հաջողվում է անել, բայց շատ հաճախ պայմանավորվածությունները չեն իրականացվում այն պատճառով, որ մասնակիցներից մեկը փորձում է հետահայաց վերաշարադրել դրանք միակողմանի առավելություն ստանալու նպատակով` ի վնաս շահերի ձեռք բերված հավասարակշռության»,-ասել է նախարարը:
