Վերջին չորս օրերի մարտերի ընթացքում, այսօր՝ ապրիլի 4-ի դրությամբ հայկական կողմն ունի 20 զոհ, 26 անհետ կորած, 72 վիրավոր: Այդ մասին Ստեփանակերտում լրագրողների հետ հանդիպմանն ասել է ԼՂՀ Պաշտպանության բանակի օպերատիվ բաժնի պետ, գնդապետ Վիկտոր Առուստամյանը:
Ինչպես հաղորդում է NEWS.am-ի հատուկ թղթակիցը, գնդապետի խոսքով, զոհերից մեկը երեխա է, երեքը՝ չափահասներ խաղաղ բնակչությունից:
Մարտերի ընթացքում ադրբեջանական կողմը տվել է 300-ից ավելի զոհ, վիրավորների թիվը ճշտվում է:
«Հայկական որեւէ բնակավայր չի գտնվում ադրբեջանական վերահսկողության տակ: Ունենք 8 դիրքի կորուստ: Այն հատվածներում, որտեղ թշնամին կարողացել է մխրճվել, խորությունը կազմում է 200-300 մետր, եւ այնտեղ բնակավայր չկա: Սա նշանակում է, որ հայկական որեւէ բնակավայր չի գտնվում թշնամու վերահսկողության տակ»,- նշել է գնդապետը:
Ապրիլի 4-ին հակառակորդն ավելի է մեծացրել օգտագործվող զինատեսակները, առաջին անգամ կիրառել է ռուսական ՏՕՍ-1 («Սոլնցեպյոկ»), սակայն վրիպել է՝ նպատակին չհասնելով: Ադրբեջանական կողմը փորձել է կիրառել «կամիկաձե» (ինքնակործանվող անօդաչու սարք), սակայն մեր հակաօդայինները կարողացել են ոչնչացնել այն:
Ըստ գնդապետի, ամեն ինչ սկսվել է ապրիլի 1-ի, լույս 2-ի գիշերը, երբ հյուսիսային ուղղությամբ դիվերսիոն գործողություններ են եղել: Առաջին ժամերի ընթացքում արձակվել է 1350 արկ «Գրադ»-ից, ինչն աննախադեպ է:
Ինչ վերաբերում է զինտեխնիկային, հայկական կողմն ունի միայն յոթ տանկի կորուստ: Ադրբեջանական կողմը կորցրել է 18 տանկ, երկու ուղղաթիռ, մեկ ինժեներական տեխնիկա, 3 հետեւակի մարտական մեքենա, 6 անօդաչու թռչող սարք, 1 ՄՄ-21 («Գրադ») կայանք:
Նշենք նաեւ, որ ամեն օր օպերատիվ իրազեկման կենտրոնը ժամը 19:00-ին հանդես է գալու առաջնագծում տիրող իրադրության վերաբերյալ թարմ տեղեկատվությամբ, լինելու է նաեւ մամուլի ասուլիս: