Մեզ թվում է, որ մենք փորձել ենք անել առավելագույնը եւ ընդդիմության ներկայացրած վեց առաջարկից հինգի վերաբերյալ առաջարկել ողջամիտ, ընդունելի լուծումներ: Այս մասին այսօր՝ ապրիլի 22-ին, Ազգային ժողովում լրագրողների հետ զրույցում ասաց Ընտրական օրենգրքի համահեղինակ, կառավարության աշխատակազմի ղեկավար-նախարար Դավիթ Հարությունյանը` պատասխանելով հարցին, թե արդյոք ընդդիմության եւ քաղաքացիական սեկտորի հետ կայացավ կոնսենսուս Ընտրական օրենսգրքի շուրջ:
«Ցանկացած երրորդ անձի համար, որ կկտրվի իրականությունից եւ կփորձի տեսնել` արդյոք մեր առաջարկությունը ողջամիտ է, թե ոչ կհանգի, այն եզրակացության, որ մեր առաջարկությունը խնդիրը լուծող առաջարկություն է: Անգամ եթե մեր գործընկերները քաղաքական պատճառներով շարունակեն կոշտ հայտարարությունները, միեւնույն է այս քննարկումների համար ձեռք բերվեցին, մշակվեցին գաղափարներ, որոնք տեղ գտան օրենսգրքում: Այս առումով համարում եմ դրական գործընթաց», - ասաց Հարությունյանը:
Նշենք, որ այսօր ԱԺ պետաիրավական հանձնաժողովում քննարկվում են Ընտրական օրենսգրքի նախագծի վերջին շտկումները, որպեսզի այն ընդգրկվի հաջորդ շաբաթ մեկնարկող քառօրյա նիստերի օրակարգում: