ՆԱՏՕ-ին կամ ԵՄ-ին Վրաստանի ինտեգրումը չի վերադարձնի Աբխազիան եւ Հարավային Օսիան, այդ խնդիրը հնարավոր է լուծել միայն խաղաղ ճանապարհով: Ըստ ՌԻԱ Նովոստիի, նման կարծիք է հայտնել Վրաստանի նախագահ Գեորգի Մարգվելաշվիլին:
«Դա ժամանակակից Վրաստանի պատմության ամենատխուր եւ ողբերգական հատվածներից է... Մենք ամենեւին չենք կարծում, որ ՆԱՏՕ-ին կամ ԵՄ-ին անդամակցությունը, հատկապես՝ ՆԱՏՕ-ին, այդ հարցերի լուծման գործիք կդառնա: Վստահ ենք, որ այդ խնդիրները կարելի է լուծել առանց ռազմական միջոցների, այլ Ռուսաստանի մասնակցությամբ այդ տարածքների բնակչության հետ քննարկումների միջոցով»,- ֆրանսիական RFI ռադիոկայանին տված հարցազրույցում հայտարարել է Մարգվելաշվիլին:
Նրա կարծիքով, Ռուսաստանը պետք է բարեկամական հարաբերություններ ունենա Վրաստանի հետ՝ իր իսկ ազգային շահերից ելնելով: Մարգվելաշվիլին եւս մեկ անգամ հայտարարել է, որ ոչ լեգիտիմ է համարում Ռուսաստանի եւ Հարավային Օսիայի հետ ցանկացած համաձայնություն: