Եթե ընտրությունն իսկական արդյունքը չի արտահայտում, ուրեմն ընտրությունը կեղծվել է: Այս մասին, այսօր՝ ապրիլի 27-ին, Ազգային ժողովում լրագրողների հետ զրույցում հայտարարել է նախկին արտգործնախարար Վարդան Օսկանյանը: ՙ
«Երբ որ խախտում է լինում թեկուզ տասը ձայն, նշանակում է տասը ձայնով շեղվել է իր արդյունքից, ուրեմն դա իսկական արդյունքը չի արտահայտում, ուրեմն ընտրությունը կեղծվել է, ես դա նկատի ունեմ: Ես միշտ ասել եմ, այո, իմ իշխանության ժամանակ էլ, կարող եք պրպտել գտնել, եղել է, որ ես հրապարակային բարձրաձայնել եմ, որ ընտրություններում եղել են լուրջ խախտումներ: Իսկ եթե կա խախտում, նշանակում է, որ արդյունքը չի արտահայտել ժողովրդի կամքը ուրեմն կեղծվել է»,-հայտարարել է Վարդան Օսկանյանը:
NEWS.am-ի հարցին, թե արդյոք իր հիմնավորումը չի նշանակո՞ւմ, որ ինքը եղել է ոչ լեգիտիմ իշխանության արտգործնախարարը, Օսկանյանը պատասխանեց. «Գիտեք, դա արդյունքի հետ կարող է կապ չունենալ: Ես ասացի՝ եթե խախտում է եղել ընտրություններում, ուրեմն ընտրությունը կեղծվել է, դրա դեմ պետք է պայքարենք: Կարող է նախագահը ընտրվել է 57 տոկոսով, բայց իրականությունը 51 տոկոս է, ես համարում եմ կեղծված ընտրություն, որովհետեւ 57 տոկաս չի ստացել, 51 է ստացել»,-նշեց Օսկանյանը:
Նրա խոսքով՝ ժողովրդի միջից ընտրության արդյունքների վերաբերյալ կասկածները պետք է հանեն նոր Ընտրական օրենսգրքով: «Մենք պետք է այդ կասկածը ժողովրդի մտքից հանենք եւ այս օրենքով ունենք հնարավորությունը դա անելու: Եթե թեկուզ մի տեղում լցոնում է լինում ու անտեղի շահարկումներ որ ընտրությունը խախտումով է լինում, մեր ժողովրդի մոտ կասկած է առաջացնում»,-ասաց Օսկանյանը:
