Ոչ մի օրենք ընտրակաշառքը չի կարող բացառել, այլ լուծումներ են պետք: Այս մասին, այսօր՝ ապրիլի 28-ին, ԱԺ-ում ընտրական օրենսգրքի քննարկման ժամանակ նշել է ՀՅԴ խմբակցության քարտուղար Աղվան Վարդանյանը:
«Կա հանրահայտ ճշմարտություն՝ լավ ընտրություններ կարելի է անցկացնել վատ օրենքով, եւ ամենալավ օրենքով էլ կարելի է անցկացնել խայտառակ ընտրություններ: Մեզ համար այս առումով հիմնարար հարցեր են մնում վարչական ռեսուրսի անսահմանափակ չարաշահումը եւ ընտրակաշառքը: Որեւէ օրենք կոռուպցիան ու ընտրակաշառքը չի բացառելու»,-ասել է նա ու հավելել, որ այստեղ այլ լուծում է անհրաժեշտ»,-ընդգծել է դաշնակացական գործիչը:
Նա ՀՅԴ-ի անունից՝ առաջարկեց 2017 թվականի խորհրդարանական ընտրությունների քարոզարշավից առաջ մասնակից բոլոր քաղաքական ուժերին «ջենտլմենական համաձայնագիր» ստորագրել, որ ո՛չ իրենք, ո՛չ էլ իրենց տարածքային թեկնածուները ընտրակաշառք չեն բաժանելու, նաեւ վերահսկման մեխանիզմներ սահմանել:
«Սա կլինի պատասխանատու, համարժեք դիրքորոշում՝ երկրի դիմագրաված մարտահրավերներին, կլինի երկրում արմատական փոփոխություններ կատարելու, նոր որակի իշխանություն ձեւավորելու նախապայման: Անկախության սերնդի, այսօր մեր հայրենիքի սահմանը պաշտպանող, թիկունքն պահող սերնդի առաջ մենք պարտք ունենք՝ թույլ տալ, որ նրանք ազատ ընտրությունների միջոցով կառուցեն ուժեղ, արդար, բարեկեցիկ Հայաստան»,-ընդգծել է Աղվան Վարդանյանը: