Այսօր Ազգային Ժողովի խմբակցությունների պատգամավորները հանդիպել են ՄԱԿ-ի ներկայացուցիչների հետ՝ քննարկելու Ընտրական գործընթացներում Հայաստանին տեխնիկապես աջակցելու հարցը։ Խմբակցությունների ներկայացուցիչները տարբեր առաջարկներ են ներկայացրել, այդ թվում՝ ՀՀԿ-ն։
ԱԺ Արտաքին հարցերի մշտական հանձնաժողովի ղեկավար Արտակ Զաքարյանը NEWS.am-ի հետ զրույցում հայտնեց, որ իրենք էլեկտրոնային գրանցման տեխնիկական մասի եւ նույնականացման քարտերի տպագրությանն աջակցելու առաջարկով են հանդես եկել։
«Մենք էլ մեր առաջարկներն ենք արել. ընտրողների գրանցման ու նույնականացման սարքերի, նույնականացման քարտերի տպագրության հնարավարության հետ կապված եւ այլն։ Եթե մենք կարողանանք ամբողջ հասարակության համար նույնականացման քարտերի տպագրության հարցը լուծել, դա էապես ավելի կհեշտացնի ընտրական գործընթացները»,-ասաց ՀՀԿ-ական պխատգամավորը։
Նա նշեց, որ ընդամենը առաջարկներ են ներկայացրել եւ դեռ վաղ է ասել՝ որ հարցերում կլինի միջազգային կառույցների աջակցությունը. «Համաձայնության չեկան, ընդամենը լսել են առաջարկները։ Յուրաքանչյուրս հիմնավորում էինք անհրաժետությունը եւ այն, թե հասարակական ինչպիսի կարեւորություն կարող է ունենալ այն»։
Հարցին՝ մտավախություն չունե՞ն, որ Ընտրական օրենսգրքի նախագծի շուրջ կոնսենսուսի բացակայությունը կարող է բացասաբար ազդել տեխնիկական աջակցության վրա, Զաքարյանն ասաց. «Եթե ԱԺ-ի 85 տոկոսը քվեարկում է Ընտրական օրենսգքրի առաջին ընթերցմանը կողմ, կոնսենսուս ասելով՝ տվյալ դեպքում ի՞նչ նկատի ունեք։ Բոլոր քաղաքական ուժերը դեռ հնարավորություն ունեն առաջարկներ անել, իդեալական կոնսենսուս երբ որեւէ հարցի շուրջ չենք ունենալու, միակ իդեալական կոնսեսուսը որ կա, դա ԼՂՀ խնդրի շուրջ է»։