Չինաստանը ծրագրում է 2016 թվականի հուլիսին տիեզերք արձակել աշխարհում առաջին քվանտային կապի արբանյակը: Ինովացիոն արբանյակի հաջող արձակման դեպքում քվանտային կապ կապահովվի տիեզերական ապարատի եւ Երկրի վրա գտնվող օբյեկտի միջեւ:
Ըստ Informing-ի, Չինաստանի գիտությունների ակադեմիայի ակադեմիկոս Պան Ցզյանվեյի խոսքով, այս տարվա երկրորդ կեսին շահագործման կհանձնվի Շանհայն ու Պեկինն իրար միացնող՝ շուրջ 2 հազար կմ երկարությամբ հաղորդակցման քվանտային ուղին:
Չինական կառավարությունը քվանտային կապի արբանյակի մշակումը սկսել է դեռեւս 2011 թվականին:
Ընդհանուր առմամբ, գիտնականները 20-րդ դարի սկզբից են սկսել տեղեկություններ հաղորդելու գաղտնագրման եւ անվտանգության մեթոդներ մշակել: Բայց դրանք առնվազն երկու զգալի թերություն ունեն: Դրանք կարելի է կոտրել հզոր հաշվողական մեքենաների օգնությամբ (օրինակ՝ քվանտային համակարգչի) կամ տեղեկատվությանը հասանելիություն ստանալ՝ այն «գաղտնալսելով» տվյալների ուղիներով: Իսկ ահա քվանտային ցանցերը կարող են լուծել այս խնդիրները:
