Հայաստանի խորհրդարանը պատրաստվում է հրաժարվել ծառայողական 11 մեքենայից: Այդ մասին հայտնել է Հայաստանի խորհրդարանի աշխատակազմի ղեկավար Հրայր Թովմասյանը` խորհրդարանական հանձնաժողովների համատեղ նիստին հանրապետության 2015-ի պետբյուջեի իրականացման մասին հաշվետվության ընթացքում:
Այժմ խորհրդարանի հաշվեկշռում 69 մեքենա կա` նախագահի եւ նրա թիկնապահական շարասյան, փոխնախագահների, խորհրդարանական հանձնաժողովների նախագահների, ինչպես նաեւ խորհրդարանի աշխատակազմի ղեկավարության համար: Մեքենաներ կան նաեւ հյուրերի ընդունման եւ տեխնիկական գործառույթների համար:
Պատգամավոր Էդմոն Մարուքյանի հարցին, թե ինչ կարիք կար այդ 11 մեքենան պահելու, եթե դրանք անպետք են համարվում, Թովմասյանը չպատասխանեց, բայց նշեց, որ պարկի կրճատումը կհանգեցնի դրա սպասարկման ծախսերի խնայողության:
