Իշխանությունը հաշվի է առել Ընտրական օրենսգրքի հարցում ընդդիմության մի շարք կարեւոր պահանջները: Այս մասին մայիսի 24-ին խորհրդարանում լրագրողներին ասել է ՀՀ կառավարության աշխատակազմի ղեկավար Դավիթ Հարությունյանը:
Նախկինում սահմանված էր, որ քվեարկածների ցուցակներին հնարավոր կլինի ծանոթանալ միայն վերահաշվարկի մասին բողոքի դեպքում: Սակայն կոնկրետ ընտրական տեղամասին հերթը միշտ չէ որ հասնում էր: Այդ պատճառով նոր օրենսգրքում իշխանություններն առաջարկում են, որ ցանկացած տեղամասում վստահված անձինք կարողանան ստանալ քվարկածների համարների ցուցակները (առանց անունի եւ ազգանունի):
Իսկ քանի որ անուն ազգանուններով եւ համարներով ընտրացուցակները հասանելի են համապատասխան գերատեսչությունների կայքերում, ապա կարելի է ասել, որ առանց Վենետիկի հանձնաժողովի պահանջները խախտելու ցուցակներին ծանոթանալու հնարավորություն կա:
Նշենք, որ ԸՕ նախագիծը խորհրդարանում պետք է ընդունվի մայիսի 25-ին 3-րդ վերջնական ընթերցմամբ:
