Մենք արձանագրում ենք, որ Ընտրական օրենսգրքի նախագիծը այս տեսքով չի լուծում որեւէ հարց՝ կապված ԵԱՀԿ-ի առաջարկությունների կատարման հետ, կապված քաղաքական ուժերի եւ հանրության բարձրացված հարցերի շուրջ, դրա համար դեմ ենք քվեարկելու: Այս մասին, այսօր՝ մայիսի 25-ին, ԱԺ-ում Ընտրական օրեսգրքի երրորդ եւ վերջին ընթերցմամբ քվեարկությունից առաջ նշել է ՀԱԿ խմբակցության պատգամավոր Լեւոն Զուրաբյանը:
«Բայց նաեւ հույս ունենք, որ կոնսենսուսի ձեռքբերման ուղղությամբ աշխատանքները կշարունակվեն»,-հավելել է նա:
Լեւոն Զուրաբյանը հիշեցրել է, որ իրենք այնուամենայնիվ նպատակ են դրել, որ ԸՕ-ի շուրջ ձեռք բերվի լայն կոնսենսուս: «Ուզում եմ, որ պարզություն մտնի մի հարցում: Մինչ այս նշվում էր, որ եթե կոնսենսուսը ձեռք բերվի, դրան կհետեւի արտահերթ նիստ, որտեղ այդ փոփոխությունները կմտցվեն օրենսգրքի մեջ: Ցանկանում եմ հասկանալ, թե իշխող ուժն ինչպես է պատկերացնում կոնսենսուսի իրագործումը, եթե այն ձեռք բերվի»:
Ի պատասխան, Կառավարության աշխատակազմի ղեկավար-նախարար Դավիթ Հարությունյանն իր եզրափակիչ ելույթում նշեց, որ այս ընթացքում եղել են շտկումներ՝ որոշ նախադասություններ վերաշարադրվել են, մի երկու վրիպակ են գտել, խմբագրել: «Եթե անգամ հունիսի 1-ից հետո մեզ հաջողվի գտնել այնպիսի մեխանիզմներ, որոնք կուժեղացնեն Ընտրական օրենսգրքի նախագիծն ու այդ մեխանիզմները իրական կլինեն, մենք ԱԺ արտահերթ նիստ կամ նստաշրջան կհրավիրենք՝ ներկայացնելու առաջարկություններ՝ փոփոխություններ կատարելու համար»,-ասել է նա:
ՀԱԿ խմբակցության մեկ այլ պատգամավոր՝ նախկին վարչապետ Հրանտ Բագրատյանն էլ ընդգծել է, որ իրենց կողմից բարձրացված հարցերը հաշվի չեն առնվել: Դիմելով իշխող մեծամասնությանը, նա ասել է. «Մեծ ռիսկ եք վերցրել՝ փորձելով հաջորդ խորհրդարանում ձեւավորել 2/3-րդ: Հետո փոշմանելու եք, որ ընդդիմության այդքան նեղացնում եք: Մենք էլ դեմ ենք քվեարկելու, առանց ըմբռնման»:
Նշենք, որ Ընտրական օրենսգրքի նախագիծը 3-րդ ընթերցմամբ ընդունվեց 102 կողմ, 17 դեմ եւ 3 ձեռնպահ ձայներով:
