Խնդիրը, որի համար մենք հավաքվել ենք, լավ հայտնի է. դա մեզ անցյալից մնացած ղարաբաղյան խնդիրն է։ Բայց ես կցանկանայի օգտվել մեր հանդիպումից մեր երկկողմ հարաբերությունների մասին խոսելու համար։ Այս մասին Ադրբեջանի նախագահ Իլհամ Ալիեւի հետ հանդիպմանն ասել է ՌԴ նախագահ Վլադիմիր Պուտինը, հայտնում է Կրեմլի պաշտոնական կայքը։
«Առաջին հերթին նոր ավարտված Սանկտ Պետերբուրգի միջազգային տնտեսական ֆորումի շրջանակներում ես կցանկանայի նշել, որ մեզ հայտնի պատճառներով, ցավոք, մենք ապրանքաշրջանառության որոշակի անկում ենք գրանցել անցյալ տարի եւ այս տարի։ Այստեղ դեր է խաղացել էներգակիրների գների անկումը, եւ մենք գիտենք դրա պատճառը։
Կցանկանայի օգտվել այսօրվա հանդիպումից, որպեսզի խոսեմ այն ամենի մասին, ինչը մեր երկկողմ կապերի մասն է կազմում, այդ թվում՝ հումանիտար բնագավառը։ Մենք գիտենք, թե Ադրբեջանում որքան ուշադիր են վերաբերվում ռուսաց լեզվի ուսուցմանը, ինչ հաջողությամբ են գործում մեր ԲՈՒՀ–երի մասնաճյուղերը։ Մենք բարձր ենք գնահատում այդ ամենը։ Հուսամ, որ նման աշխատանքը կշարունակվի նաեւ բոլոր ուղղություններով»,– ասել է Պուտինը։