Ազգային ժողովի «Ժառանգություն» խմբակցության պատգամավոր Զարուհի Փոստանջյանին հետաքրքրում է, թե այս տարիների ընթացքում ինչպես են միշտ նույն մարդիկ լինում իշխանության մեջ, նույն քաղաքական ուժը, մինչդեռ ժողովրդի սոցիալ- տնտեսական վիճակը վատթարանում է:
«Ինչպե՞ս է լինում, որ իշխանափոխություն չի լինում: Ի՞նչ է՝ մեր քաղաքացիները չեն հասկանում, որ չպետք է ընտրեն այս տեսակ իշխանություններին»,- այսօր՝ հունիսի 27-ին, Ընտրական օրենսգրքում փոփոխություններ եւ լրացումներ կատարելու մասին օրենքի նախագծի քննարկման ժամանակ ասաց Զարուհի Փոստանջյանը՝ դիմելով հիմնական զեկուցող, Կառավարության աշխատակազմի ղեկավար- նախարար Դավիթ Հարությունյանին:
Դավիթ Հարությունյանն էլ արձագանքեց, թե՝ Ձեր ելույթները լսելուց հետո հիասթափվում են եւ որոշում՝ իշխանությանը ձայն տալ:
«Դուք սխալվում եք, քաղաքացիները ձեզ ձայն չեն տալիս: Ինչպես 1996թ. երբ հավաքված էին Ազգային անվտանգության խորհրդի նիստում, որտեղ ներկա էր նաեւ ձեր քաղաքական ղեկավարը, հայտարարվեց, որ նույնիսկ 100 տոկոս հավաքեիք, իշխանությունը չէինք տալու, թույլ չէինք տալու գայիք իշխանության: Նույնն էլ հայտարարվեց Սերժ Սարգսյանի կողմից՝ որքան ուզենք, այնքան կխփենք: Դուք զբաղվել եք խփելով, եկել է պահը ձեզ խփելու»,- ասաց Զարուհի Փոստանջյանը:
Դավիթ Հարությունյանն անպատասխան թողեց Փոստանջյանի խոսքերը:
Նշենք, որ Ընտրական օրենսգրքում փոփոխվում են այն դրույթները, որոնց վերաբերյալ ՀԱԿ-ը պահանջներ էր ներկայացրել իշխանությանը։ Հունիսի կեսերին վերսկսված 4+4+4 ձեւաչափով քննարկման ժամանակ իշխանությունը ներկայացրել էր կատարված փոփոխությունները։ Ըստ դրանց՝ ՀԱԿ-ի հինգ պահանջներից 4-ը ընդունվել էր, ինչի շուրջ կողմերը եկել են կոնսենսուսի։ Ըստ ձեւակերպման՝ ոչ թե Ընտրական օրենսգրքի շուրջ են կողմերը եկել կոնսենսուսի, այլ վերահսկողական մեխանիզմների։ Նախկինում հայտարարվել էր, որ եթե կողմերը այս փոփոխությունների շուրջ կոնսենսուսի գան, արտահերթ նիստով դրանք ընդգրկվելու են Ընտրական օրենսգրքում։
Հիշեցնենք, որ այս կոնսենսուսը միտված էր միջազգային կառույցներից վերահսկողական մեխանիզմների գործադրման համար ֆինանսական աջակցություն ստանալուն։ Սակայն հիմա պարզվում է՝ նախկինում շրջանառված 15 միլիոն դոլարից 10 միլիոնն են տրամադրելու, իսկ իշխանությունը չի պատրաստվում բացը լրացնել։
