Կառավարության աշխատակազմի ղեկավար- նախարար Դավիթ Հարությունյանը նախօրեին մատնեց իրենց դիրքերում խուճապը: Այս մասին այսօր՝ հունիսի 28-ին, Ընտրական օրենսգրքում փոփոխություններ եւ լրացումներ կատարելու մասին օրենքի նախագծի քննարկման ժամանակ ասաց «Ժառանգություն» խմբակցության պատգամավոր Զարուհի Փոստանջյանը:
«Եթե մարդը չի ունենում քաղաքական հիմնավորումներ՝ պատասխանելու մարդկանց, ապա հղում է անում մարդկանց սեռական պատկանելիությանը՝ շեշտելով, որ ես կին եմ, չի պատասխանում, բայց եթե տղամարդ լինեի, կպատասխաներ: Ես այստեղ ոչ կին եմ հանդես գալիս, ոչ տղամարդ, ես քաղաքական գործիչ եմ, որը հարցեր է բարձրացնում եւ ակնկալում պատասխաններ»,- ասաց ընդդիմադիր պատգամավորը:
Ըստ Զարուհի Փոստանջյանի՝ հասկանալի է, որ իշխանությունները պատասխաններ չունեն, քանի որ դժվար է ներկայացնել մի ղեկավարի, որը հանձնել է հայրենի բնօրրանի տարածքները. «Հայրենի բնօրրանի ազատագրումը պայմանավորեց մեր զինվորների անգին կյանքով: Մինչդեռ հայտնի է, որ պատերազմի առաջին օրը մեր զինվորների անգին կյանքը պաշտպանված չի եղել, տեսանյութից պարզ է դառնում՝ զինվորները մենակ են մնացել առաջին գծում, կրակելու հրաման չեն ունեցել ու կանխել են աղետը՝ թշնամու առկայությունը Ստեփանակերտում»:
Զարուհի Փոստանջյանի կարծիքով՝ այժմ պատերազմի հաջորդ փուլն է, երբ պետք է պայքարել արտաքին եւ ներքին թշնամու դեմ, իսկ այդ պայքարի համար պետք են մարդիկ, որոնք չեն գնա Ռուսաստան ու չեն զիջի օդային տարածքը: Փոստանջյանը համոզված է, որ հակաօդային պաշտպանությունը Ռուսաստանին զիջելը մեծ սխալ է, քանի որ բոլորիս է հայտնի, թե ինչպես ՀԱՊԿ-ն ու Ռուսաստանն արձագանքեցին քառօրյա պատերազմին:
ԱԺ փոխնախագահ Էդուարդ Շարմազանովն էլ արձագանքեց. «Ես կարծում էի՝ այս երեք օրերի աղոթքը մեզ ավելի բարի կդարձնի, բայց ավաղ»:
Հիշեցնենք, որ նախօրեին Զարուհի Փոստանջյանը հայտարարել էր. «Ինչպես 1996թ. երբ հավաքված էին Ազգային անվտանգության խորհրդի նիստում, որտեղ ներկա էր նաեւ ձեր քաղաքական ղեկավարը, հայտարարվեց, որ նույնիսկ 100 տոկոս հավաքեիք, իշխանությունը չէինք տալու, թույլ չէինք տալու գայիք իշխանության: Նույնն էլ հայտարարվեց Սերժ Սարգսյանի կողմից՝ որքան ուզենք, այնքան կխփենք: Դուք զբաղվել եք խփելով, եկել է պահը ձեզ խփելու»:
Դավիթ Հարությունյանն անպատասխան էր թողել Փոստանջյանի խոսքերը:
Նշենք, որ Ընտրական օրենսգրքում փոփոխվում են այն դրույթները, որոնց վերաբերյալ ՀԱԿ-ը պահանջներ էր ներկայացրել իշխանությանը։ Հունիսի կեսերին վերսկսված 4+4+4 ձեւաչափով քննարկման ժամանակ իշխանությունը ներկայացրել էր կատարված փոփոխությունները։ Ըստ դրանց՝ ՀԱԿ-ի հինգ պահանջներից 4-ը ընդունվել էր, ինչի շուրջ կողմերը եկել են կոնսենսուսի։ Ըստ ձեւակերպման՝ ոչ թե Ընտրական օրենսգրքի շուրջ են կողմերը եկել կոնսենսուսի, այլ վերահսկողական մեխանիզմների։ Նախկինում հայտարարվել էր, որ եթե կողմերը այս փոփոխությունների շուրջ կոնսենսուսի գան, արտահերթ նիստով դրանք ընդգրկվելու են Ընտրական օրենսգրքում։
Հիշեցնենք, որ այս կոնսենսուսը միտված էր միջազգային կառույցներից վերահսկողական մեխանիզմների գործադրման համար ֆինանսական աջակցություն ստանալուն։ Սակայն հիմա պարզվում է՝ նախկինում շրջանառված 16 միլիոն դոլարից 11 միլիոնն են տրամադրելու, իսկ իշխանությունը չի պատրաստվում բացը լրացնել։