Հայաստանի Ազգային ժողովն այսօր՝ հունիսի 29-ին, 106 կողմ, 6 դեմ ձայներով ընդունել է Ընտրական օրենսգրքի փոփոխությունների մասին օրենքի նախագիծն առաջին ընթերցմամբ:
Նախքան քվեարկությունը ՀԱԿ խմբակցության պատգամավոր Գագիկ Ջհանգիրյանը հայտարարեց, որ ՀԱԿ-ը կողմ է քվեարկելու օրինագծին. «Այս ֆորմատը նախաձեռնել է ՀԱԿ-ը, այլ քաղաքական ուժերի հետ միասին, մենք կողմ ենք այս փոփոխություններին, բայց դա չի նշանակում կողմ ենք ընդհանուր Ընտրական օրենսգրքին: Չհամաձայնեցված հարցերը շատ են, հատկապես բաց համամասնական համակարգի հետ կապված»,-ասաց նա:
ԲՀԿ խմբակցության ղեկավար Նաիրա Զոհրաբյանը եւս հայտարարեց, որ իրենց խմբակցությունը կողմ է քվեարկելու ընտրական օրենսգրքում փոփոխություններին:
Փոխարենը պատգամավոր Ռուբիկ Հակոբյանն ասաց, որ դեմ է քվեարկելու. «Նախադեպը չունեցող գործարքատիպ բան է օրենսդրական դաշտում, երբ ընդունում ենք օրենք, դա պայմանավորելով դոնոր կազմակերպությունների օժանդակությամբ: «Եթե»-ով նախագծին չեմ կարող կողմ լինել, դեմ եմ քվեարկելու»: Դեմ արտահայտվեց նաեւ «Ազատ դեմոկրատներ»-ի ղեկավար Խաչատուր Քոքոբելյանը:
Կողմ քվեարկեցին նաեւ նորաստեղծ «Համախմբում» կուսակցության անդամ պատգամավորները. «ԸՕ փոփոխություններն իրականում մեկ քայլ առաջ են. «Համախմբումը» կողմ է քվեարկելու»,-ասաց «Համախմբում»-ից Էլինար Վարդանյանը՝ հույս հայտնելով, որ եւս մեկ անգամ անդրադարձ կլինի օրենսգրքին, քանի որ բաց համամասնական ցուցակները վերանայման կարիք ունեն:
