Դեռեւս ոչ ոք չի ասել, որ Ընտրական օրենսգրքի վերահսկողական մեխանիզմները իրագործելու նպատակով խոստացված 9 միլիոն եվրոն հաստատ տրամադրելու են։ Այս մասին NEWS.am-ի հետ զրույցում ասաց «Իրազեկ քաղաքացի միավորում» ՀԿ-ի ներկայացուցիչ Դանիել Իոաննիսյանը՝ անդրադառնալով 4+4+4 ձեւաչափով արձանագրած կոնսենսուսից հետո միջազգային դոնոր կազմակերպություների խոստացած 9 միլիոն եվրոյին։

«Անգամ այդ 9 միլիոն եվրոյի վերաբերյալ դեռեւս չկա վերջնական որոշում»։

Դիտարկմանը, թե եթե 4+4+4 ձեւաչափով քննարկման կողմ հանդիսացող քաղաքացիական հասարակությունն էլ միանար փոխհամաձայնությանը, այդ գումարն ամբողջությա՞մբ կտրամադրեին, Իոաննիսյանը պատասխանեց․ «Քաղհասարակության դիրքորոշումը կարեւոր կլինի միջազգային դոնորների համար, քանի որ իրականում միջազգային դոնորների սպեկտորը բավականին մեծ է։ Եթե քաղաքացիական հասարակությունն, այպես ասած, «օրհնի» այս գործը, հնարավոր է, որ գտնվեն նոր դոնորներ, որոնք լրացուցիչ աջակցություն կտան եւ 16 միլիոնը կլրանա։ Կան դոնորներ, որոնց համար շատ կարեւոր է քաղաքացիական հասարակության դիրքորոշումը»։

Ըստ Իոաննիսյանի՝ իրենց միանալու դեպքում մի գուցե ավելի հեշտ գտնվեր այդ գումարը,  բայց ի վերջո, Հայաստանի իշխանությունը կարող էր կրճատել որոշ  ծախսեր եւ  տրամադրեր այդ պակասը սեփական երկրում ժողովրդավարության հաստատման համար։

Հիշեցնենք, որ իշխանության, ընդդիմության եւ քաղաքացիական հասարակության միջեւ  ընդդիմության 5 պահանջի շուրջ 4+4+4 ձեւաչափով քննարկումները ավարտվեցին միայն իշխանության եւ ընդդիմության միջեւ կոնսենսուսով։ Քաղաքացիական հասարակությունը համարեց, որ չեն ընդունվել իրենց առանցքային առաջարկները եւ չմիացավ այդ փոխհամաձայնությանը։ Այսօր փոխհամաձայնության եկած կողմերին չի հաջողվում ամբողջությամբ գտնել  վերահսկողական մեխանիզմների  իրագործման համար պահանջվող 16 միլիոն եվրոն։ 9 միլիոնի խոստում կա, 3-ը պետությունն  է տրամադրելու, 4-ը դեռեւս չի գտնվում։