Սեյրան Օհանյանի բախտն ու ճակատագիրը տնօրինելու իրավունքը բացառապես պատկանում է Սեյրան Օհանյանին: Այս մասին Facebook-ի իր էջում գրել է ՀՀ պաշտպանության նախարարի մամուլի խոսնակ Արծրուն Հովհաննիսյանը՝ անդրադառնալով «Հրապարակ» թերթի հրապարակմանը, որտեղ նշվել էր, որ Սեյրան Օհանյանի հայտարարությունը, թե մերժելու է Հավաքական անվտանգության պայմանագրի գլխավոր քարտուղարի պաշտոնում նշանակվելու առաջարկը, վատ է ընդունվել:
«ՀՀ ՊՆ Սեյրան Օհանյանը հանդիսանում է ՀՀ քաղաքացի, օգտվում է Սահմանադրությամբ եւ օրենսդրությամբ երաշխավորված իրավունքներից եւ ազատություններից, ներառյալ ` աշխատանքի եւ գործունեության ազատության իրավունքը»,-նշել է Արծրուն Հովհաննիսյանը:
Նշենք, որ «Հրապարակ» թերթը գրել էր. «Պաշտպանության նախարար Սեյրան Օհանյանի հայտարարությունը, թե մերժելու է ՀԱՊԿ գլխավոր քարտուղարի պաշտոնում նշանակվելու առաջարկը, իշխանության մեջ վատ է ընդունվել: «Պետական ծառայողը, զինվորականը, պաշտպանության նախարարն իրավունք չունի նման բան ասելու, նա զինվորական է, պետք է կատարի վերադասի հրամանը, ծառայի այնտեղ, որտեղ ասվում է, սա հո պատվերով համերգ չէ՞, որ ընտրի, մի հատ էլ հայտարարի, թե միանշանակ մերժելու է միջազգային կառույցում աշխատելու առաջարկը»:
