56 մլն տարի առաջ Երկրի վրա գրանցված տաքացումը տեղի է ունեցել գիսաստղի հետ մեր մոլորակի բախվելու հետեւանքով: Այս մասին հայտարարել են ԱՄՆ երկրաբանական միության գիտնականները, փոխանցում է Informing-ը:
Գիտնականները համոզված են, որ գիսաստղը Երկրի մեջ է մխրճվել դինոզավրերի անհետանալուց հետո: Գիսաստղի հարվածից Երկրի մթնոլորտում մեծացել է ածխածնի մակարդակը, իսկ օդի ջերմաստիճանը բաձրացել է մոտ 5-8 աստիճանով: Դրանից հետո մոլորակը սկսել են բնակեցնել նոր տեսակի կենդանիներ: Այդ ժամանակ էլ հայտնվել են մարդու անմիջական նախահայրերը, համոզված են գիտնականները:.
Նրանք նշում են, որ Երկրի հետ գիսաստղի բախման տեղեկությունները ստացել են ապակենման սեւ գնդերի վերլուծության շնորհիվ, որոնք գտնվել են Նյու Ջերսիի ափամերձ շրջանում: Ըստ գիտնականների՝ դրանք ձեւավորվել են գիսաստղի ընկնելու հետեւանքով: Դրանք չէին կարող հրաբխի ժայթքման հետեւանքով առաջանալ, քանի որ դրանց մեջ ջրի խտությունը նորմայից 0,03 տոկոսով ցածր է:
Գիտնականների կարծիքով՝ մոլորակի վրա ջերմաստիճանը կարող էր բարձրանալ այն պատճառով, որ գիսաստղը վնասել է նավթային ավազանը: Նավթի այրումը առաջացրել է ջերմաստիճանի երկարատեւ բարձրացում:
Նրանք նաեւ նշել են, որ առաջիկա 100 տարվա ընթացքում գլոբալ տաքացումն իր գագաթնակետին չի հասնի: Նրանց համոզմամբ՝ ջերմաստիճանի աստիճանական բարձրացմանը մարդկությունը կկարողանա հարմարվել: